Засгийн газрын хуралдаанаас хүүхэд бүрт, цаашлаад хөгжлийн бэрхшээлтэй, өрх толгойлсон, хүнсний талон зэрэгт 593 тэрбум төгрөг зарцуулахаар болсныг мэдэгдсэн билээ. Уг асуудлаар ХНХ-ын сайд С.Чинзориг "Өмнө нь НДШ-ийг төрөөс төлөх шийдвэр гаргасан. Энэ бол ажил олгогчдыг дэмжих, ажлын байрыг хамгаалах, иргэдийн орлогын эх үүсвэрийг хамгаалах ач холбогдолтой. Нийт 124 мянган сайн дурын даатгуулагч хамрагдсан мэдээ бий. 39 мянган ААН нийгмийн даатгалын шимтгэлийн тайланг өгч чөлөөлөгдөх арга хэмжээнд хамрагдсан байна. Цаашид энэ бүхэн үргэлжилнэ. Хувийн хэвшлийн бүх ААН энэ хөнгөлөлт, чөлөөлөлтөд хамрагдана. Зарим нэг дүүргийн Нийгмийн даатгалын байцаагч нар ойлголтын зөрүүгээс болж асуудал үүсгэсэн байна лээ. НДШ-ийн өртэй байсан ч энэ чөлөөлөлтөд хамрагдана.

Мөн 0-18 насны хүүхдийн сар бүр авдаг мөнгөн тэтгэмжийн хэмжээг дөрөвдүгээр сараас аравдугаар сар хүртэл зургаан сарын хугацаанд сар бүр 100 мянган төгрөг болгох шийдвэрийг гаргасан. Дөрөвдүгээр сард хүүхэд бүрд 30 мянган төгрөг олгосон. Тэгэхээр дөрөвдүгээр сарын мөнгөнөөс олгогдоогүй үлдсэн 70 мянган төгрөгийг өнөөдрөөс данс руу шилжүүлнэ. Улсын хэмжээнд 1 сая 190 мянга орчим хүүхэд бий. Эдгээрээс 94 хувь нь хүүхдийн мөнгө авч байна. Бусад ниймгийн халамж, хүнсний талоны мөнгө энэ сарын 1-наас эхлэн нэмэгдсэн байдлаар олгогдож эхэлнэ. Ерөнхий сайдын шийдвэр бол эцсийнх. Тэтгэмж нэмнэ гэсэн бол нэмнэ" гэлээ.