Засгийн газрын ээлжит хуралдаан өнөөдөр боллоо. Энэ үеэр Зариг.мн сайтын сэтгүүлч  Н.Өнөрцэцэг "ТЕГ-ын дарга, генерал Д.Гэрэлтэй холбогдох сурвалжлагыг манай сайт бэлтгэн хүргэсэн. Энэ асуудлаар цагдаагийн байгууллагаас тодруулах гэтэл цагдаагийн алба хаагч миний биед халдсан. Энэ асуудлыг ЦЕГ-ын Дотоод хяналт шалгалтын газраас шалгаж үзээд цагдаагийн алба хаагч сэтгүүлчийн биед халдаагүй байна. Энэ нь тухайн үед байсан гэрч болон камерийн бичлэгээр тогтоогдсон гэсэн хариу гарсан байна. Цагдаа нар хэвлэлийн эрх чөлөөнд халдаж болдог юм уу" гэдгийг тодруулсан. 

Үүний хариуд Ерөнхий сайд У.Хүрэлсүх "Хууль бус зүйл хийсэн бол хариуцлага хүлээх ёстой. Та бүхний тавьсан албан шаардлагыг хүлээж авсан. Гэхдээ Ерөнхий сайд шалгалт хийдэггүй. Ийм эрхгүй. Холбогдох байгууллага ямар дүн гаргасан байна, тэрүүгээр нь явна. Сэтгүүлчдийн эрхийг зөрчиж болохгүй гэж байнга хэлдэг. Нөгөө талаасаа сэтгүүлч та хариуцлагатай байх ёстой. Сэтгүүлчдийн ёс зүй чухал байна. Ёс зүйтэй байх ёстой.

Сэтгүүлч гэдгээр далайлгаж төрийн хуулийг зөрчиж, бусдыг доромжилж болохгүй.

Тиймээс цаашдаа төрийн хууль зөрчсөн, төрийн алба хаагчийг доромжилсон үйлдэл гаргавал та ч гэсэн хариуцлага хүлээнэ шүү. Үүн шиг хуулийн байгууллага ч гэсэн хариуцлага алдсан бол мөн адил хуулийн дагуу хариуцлага хүлээнэ" гэлээ.