УИХ-ын гишүүн асан Н.Номтойбаярыг АТГ-аас хоёр үндэслэлээр шалгаж улмаар яллагдагчаар татаад байсан. Гэвч шүүхээс хэргийг прокурорт буцаах шийдвэр гаргасан юм. Үүнтэй зэрэгцэн тэрбээр УИХ-ын гишүүний бүрэн эрхээсээ түдгэлзэж, улмаар бие даан нэр дэвшихээ мэдэгдсэн. 

АТГ-ын Мөрдөн шалгах хэлтсээс түүнийг Хөдөлмөр эрхлэлтийг дэмжих сангаас хамаарал бүхий этгээдэд зээл авч өгсөн байж болзошгүй үндэслэлээр шалгаж буй.

Тодруулбал, түүнийг Дорнод аймаг дахь компанид 200 сая төгрөгийн зээл олгоход эрх мэдэл, албан тушаалаа урвуулсан байх магадлалтай хэмээн үзжээ. 

Мөн хэрэгт шалгагдаж байгаа Б.Нямдаваа, Хөдөлмөрийн асуудал хариуцсан дэд дарга Б.Шижиржаргал нарыг ажлаас нь чөлөөлж, яллагдагчаар татах үед “Тухайн үед Н.Номтойбаяр сайдын өгсөн үүрэг даалгаврыг биелүүлж, хууль зөрчиж зээл олгосон. Энэ асуудалд Н.Номтойбаяр холбоотой” гэх утга бүхий мэдүүлэг өгсөн гэдгийг хэвлэл мэдээллийн хэрэгслээр мэдээлж байсан юм.

Тэгвэл нийслэлийн Прокурорын газраас Н.Номтойбаярыг албадан ирүүлэх шүүгчийн захирамж гаргуулах хүсэлт гаргасан байна.

Энэ хүсэлтийг яг одоо Чингэлтэй дүүргийн Эрүүгийн хэргийн анхан шатны шүүхэд хэлэлцэж байна. Өөрөөр хэлбэл, Н.Номтойбаярыг прокуророос яллагдагчаар татаж, тогтоол танилцуулах албан мэдэгдэл явуулсан ч танилцаагүй, дуудсан цаг нь очихгүй байгаа бололтой. Тиймээс шүүхэд ийн хандаж, албадан ирүүлэх хүсэлт гаргажээ.