УИХ-ын чуулганаар Элчин сайдыг эгүүлэн татах, томилох тухай Ерөнхийлөгчийн саналыг хэлэлцэж байна. Монгол Улсын Ерөнхийлөгч Х.Баттулга хуульд заасан бүрэн эрхийнхээ хүрээнд БНХАУ-д суугаа Онц бөгөөд Бүрэн эрхт Элчин сайд Д.Ганхуягийг эгүүлэн татаж, түүний оронд Элчин сайдаар ОБЕГ-ын дарга, генерал Т.Бадралыг, БНСУ-д суугаа Онц бөгөөд Бүрэн эрхт Элчин сайд Б.Ганболдыг эгүүлэн татаж, Н.Эрдэнэтуяаг тус тус томилох саналаа УИХ-тай зөвшилцөхөөр ирүүлснийг хэлэлцэж дэмжлээ. 

Энэ үеэр УИХ-ын гишүүн Д.Лүндээжанцан “Томилгоо ярихаар хужирласан мал шиг шавцгаах” юм гэж дургүйцлээ илэрхийлсэн.

Ш.Раднаасэд: Элчин сайд болж байгаа хоёр хүнийг дэмжиж байна. Т.Бадрал даргын үед онцгой байдлын байгууллага ямар хэмжээнд хүрч, онцгой цаг үеийг хэрхэн зохион байгуулж ажиллаж байгааг бид бүгдээрээ харж байна.

Я.Санжмятав: Солонгос болон Хятадад томилогдох гэж байгаа Н.Эрдэнэтуяа, Т.Бадрал нарыг дэмжиж байна. Ялангуяа коронавирусийг энэ түвшинд барихад Т.Бадралаар ахлуулсан хамт олны хичээл зүтгэл их байсан. Цаашид ч хичээл зүтгэлтэй ажиллах хэрэгтэй шүү. Монгол-Хятадын харилцаа шинэ түвшинд ирсэн алтан үе гэдгийг анхаарах ёстой. Монгол, Хятад, Оросын бүс замын ажил тулчихсан байгаа. Тиймээс Засгийн газар руу дахин үүрэг өгөөд маргааш гэхэд Элчин сайдуудаа томилох ажлыг шийдвэрлэе.

Б.Пүрэвдорж: Т.Бадрал генералын хувьд 1994 онд МУИС-ийн Гадаад харилцааны ангийг төгссөн. Ялангуяа сүүлийн үед байгууллагын гадаад харилцаа тал дээр шуурхай сайн ажилласан. 270 тэрбум төгрөгийн евро стандартын тоног төхөөрөсмжийг олон улсын байгууллагуудаас тусламжаар авсан байна. Мэргэжлийнхээ дагуу БНХАУ-д хоёр орны харицлааг шинэ шатанд гаргах ажлыг үр дүнтэй хийнэ гэсэн итгэл байна.

Г.Занданшатар: Дараагийн элчин сайд нарыг томилох талаар Я.Санжмятав гишүүн ярилаа. Олон улсын нөхцөл байдал марагүй байна. Коронавирусээс эхлээд хөл хорио зэрэг нөхцөл байдпал хүнд байна. Тиймээс ойрын хоёр зайлшгүй томилох шаардлагатай нөхцөл байдалтай уялдуулж БНХАУ-д Т.Бадралыг, БНСУ-д Н.Эрдэнэтуяа нарыг томилохоор шийдвэрлэсэн. Эдгээр хүмүүс нам бус, төрийн жинхэнэ алба хаагчид юм шүү. Салбар салбартаа гавьяа байгуулсан мэргэжлийн хүмүүс. Ямар нэгэн буруу зөрүү ойлголт байх ёсгүй. Мөн Элчин сайдаар томилогдож байгаа хүмүүс гишүүдийн хэлсэн захиасыг анхаарч үзээрэй. Мөн ОХУ-д мөн генерал томилсон. Хоёр хөршид хоёр генерал томилж байгаа нь санамсаргүй тохиолдол биш.