УИХ-ын чуулганаар Элчин сайдуудыг томилохтой асуудлыг хэлэлцэж, шийдвэрлэсэн. Үргэлжлүүлээд Монголбанкны тэргүүн дэд ерөнхийлөгчид нэр дэвшигчийг томилох эсэх асуудлыг хэлэлцэж байна.

Ж.Батзандан: Монголбанкны тэргүүн дэд ерөнхийлөгчид 30 орчим насны залуучууд нэр дэвшиж байна. Залуучуудыг дэмжиж дэд ерөнхийлөгч болгоно гэж бодохыг буруу биш. Гэхдээ 30 настнуудыг доош нь хийж байгаа юм биш нэг л итгэж өгөхгүй нь. Энэ хүний боловсрол, сурсан сургууль, чадварт эргэлзэж байгаа юм алга. Эрх баригч нам энэ залууг тавина гэсэн бол олонхоороо шийдээд тавих байлгүй. Харин хэд хэдэн зүйлийг нэр дэвшигчээс асууя. Өнөө маргаашгүй хар жагсаалтад орох талаар яригдаж байна. Энэ нь Монгол Улсын мөнгөний бодлого буруу байгаагийн шинж. Мөнгөний бодлогоо удирдаж чадахгүй байна гэсэн үг. Хоёрдугаарт, Монголбанкинд мэргэжлийн хүмүүс хэрэгтэй. Г.Дөлгөөн 30 нстай. Зоримог арга хэмжээ авахгүй бол банк, санхүүгийн систем болж дууслаа. Энэ талаар бодсон зүйл бий юу?

Г.Дөлгөөн: Монгол болон Исланд улсын “Саарал жагсаалт”-аас гарах тайлангийн хурал хойшлогдоогүй. Европын холбоон дээр гарсан Хар жагсаалтын талаар сонин хэвлэлээс харсан. Гэхдээ албажиж шийдвэр гараагүй юм байна лээ. Миний бие Хар жагсаалтад орохгүй, Саарал жагсаалтаас гарах чиглэлээр ажиллаж бүхнээ дайчлан ажиллана. Монгол Улсын зээлийн жигнэсэн дундаж хүү 16, 17 хувьтай байдаг. Хууль тогтоомжид тодорхой хэмжээний өөрчлөлт хийгээд өгчихвөл зээлийн хүү буурах боломжтой гэж харж байгаа. Банкны системийн шинэчлэлийн хувьд хууль тогтоомжийн олон шинэчлэлт явж байна. Энэ бүгдэд өөрийн хүч хөдөлмөрөө дайчлан ажиллана.

Х.Нямбаатар: Төрийн банктай холбоотой асуудал байдаг. Энэ асуудлыг ямар шатанд, яаж шийдвэрлэв. Мөн Төрийн банкыг толгойлох явцдаа ямар үр дүн гаргаж ажиллав. Бөөрөнхий хариулмааргүй байна шүү.

Г.Дөлгөөн: Төрийн банктай холбоотой шүүхийн шатанд явж байгаа хэд хэдэн асуудал бий. Тухайлбал, “Алтжин” компанийн асуудал 2013 онд үүссэн. Прокурорын дүгнэлт гараад хэрэг шүүхийн шатанд ороход бэлэн болсон. Миний 2018 онд Төрийн банкны гүйцэтгэх захирлаар томилогдсон. Тухайн үед банкны баланс нь хасах алдагдалтай байсан. Өнөөдөр түүхэндээ анх удаа 21 тэрбум төгрөгийн ашигтай ажиллаж байна. Балансаа тэлж чадсан гэж бодож байна.

Б.Лхам