УИХ-ын үдээс хойшхи чуулганы хуралдаанаар “Алсын хараа-2050” урт хугацааны хөгжлийн бодлогыг хэлэлцэж байна.

Энэ үеэр УИХ-ын гишүүн Н.Учрал "Тэтгэврийн шинэчлэл хийнэ гэж олон жил ахмадууддаа худлаа ярилаа. Хувийн нэмэлт тэтгэврийн санг нэвтрүүлнэ гэж лоозон хийгээд 20 жил боллоо. Төр нь жил бүр төсвөөсөө алдагдал хүлээдэг. Нийт ахмадуудын 80 хувь нь хөдөлмөрийн хөлсний доод хэмжээнээс бага мөнгө авдаг. Ахмадууд алийн болгон хууртаж амьдрах вэ. Тийм учраас төрийн болон хувийн тэтгэврийн сангаас мөнгө авдаг болгох нарийн зохицуулалт хийх хэрэгтэй. Нэг сая төгрөгийн цалинтай иргэн сард 170 мянган төгрөгийг тэтгэвэрийн сандаа төллөө гэж бодъё. Үүнээсээ дөрвөн хувийг нь л хувийн тэтгэврийн сандаа оруулаад яваад байвал 30 жилийн дараа 232 сая төгрөг авах боломжтой. Том утгаар нь харахгүй бол хэдэн улстөрчид сонгууль болохоор л янз янзын зүйл ярьж гарч ирдэг. Нийт иргэддээ уриалахад "тэтгэвэр.мн" рүү ороод тооцож үзээрэй. Улстөрийн намуудыг шахаасай гэж хүсч байна" гэлээ. 

А.Сүх