УИХ-ын 2020 оны ээлжит сонгуульд нэр дэвшигчийг тодруулах намын бага хурал эхэллээ. Энэ удаагийн сонгуульд МСНЭ-ийн ерөнхийлөгч асан Х.Мандахбаяр нэр дэвших товтой байгаа. Энэ талаар тэрбээр “Өмнөговь аймагт нэр дэвшихээр хүсэлтээ өгсөн. Хурлын дараа мэдээлэл өгье” гэсэн.

Харин УИХ-ын гишүүн Х.Нямбаатар сэтгүүлчдийн асуултад хариулт өглөө.

-Ямар хүмүүс нэр дэвших бол?

-Бага хурлаас нэрс тодорхой болно. Хэвлэлийн төвшинд мэдээлэлтэй байна.

-20 гаруй гишүүнийг нэр дэвшүүлэхгүй гэсэн мэдээлэл байна. Энэ үнэн үү?

-Ёстой мэдэхгүй. Намын удирдлага 20 гаруй гишүүнийг нэр дэвшүүлэхгүй гэдгээ уулзаж хэлсэн гэсэн шуум сонссон. Гэхдээ албан ёсны мэдээлэл биш. Намын бага хурлаас нэрс тодорхой болно.

-Хурал шударга явагдах болов уу?

-Дүрмээрээ л явна.

-Сонгинохайрхан дүүргийн тойрогт зарим эмэгтэй гишүүдийг нэр дэвшүүлэхгүй гэсэн мэдээлэл бий. Энэ үнэн үү?

-Мэдэхгүй. Дунд шатны намын байгууллагаас нэр дэвших хүсэлтэй байх хүний хүсэлтийг нийслэлийн намын хороо руу хүргүүлсэн. Хэний ч нэрийг хасаагүй.

-Ерөнхий сайд ямархуу байр суурьтай байгаа юм бол?

-Би өмнөөс нь байр сууриа илэрхийлэх боломжгүй.

-Хэдийд нэрс тодрох бол?

-Өмнөх хурлуудаас харахад тухайн өдрийн 22.00 цагийн үед нэрс эцэслэгдэж байсан. Энэ жишгээр явах болов уу.