“Шүүхээр нотлоогүй бол гэм буруутайд тооцохгүй” гэдэг. Энэ үнэн. Хүмүүнлэг ардчилсан нийгэм цогцлоож буй гэх урианд зүй ёсоор нийцнэ.

Гэвч үүгээр халхавчлан Монгол төрийн оршин тогтнох үндэс суурь, улсын аюулгүй байдал, төрийн эрх мэдэлд харшлах маш ноцтой үйлдэл хийгдэж байна.

Тодруулбал,  Монгол Улсын Ерөнхийлөгч Х.Баттулга Улсын Дээд шүүхийн Ерөнхий шүүгч Х.Батсүрэнг 2020 оны тавдугаар сарын  20-нд чөлөөлөв. Шалтгаан үндэслэл нь Ерөнхий шүүгч Х.Батсүрэн өргөдлөө өгсөн гэв.

Түүнийг 2019 оны тавдугаар сарын 9-ний өдөр Ерөнхийлөгч Х.Баттулга өөрөө зарлигдан томилж байв.

Тэрээр энэ нэг жилийн хооронд Ерөнхийлөгчөөс УИХ-д өргөн барьсан Шүүхийн тухай багц хуулийн төсөлд хамтран ажиллажээ. Мөн олны анхаарал татсан хэмээх хэргүүдэд зохих хэмжээний ахиц гарч, хэргийн мөрдөн шалгалт, шүүхийн шийдвэрлэлт эхэлсэн. Түүнчлэн авлига, албан тушаалын гэмт хэрэгт нам, намын эрх мэдэл, албан тушаалд ажиллаж байсан нөхдүүд шалгагдаж, хэрэг нь прокурор, шүүхийн шатанд ирээд байв.

Яг ийм цаг үед Дээд шүүхийн Ерөнхий шүүгч өөрөө өргөдлөө өгсөн гэдэг нь нэг л үнэмшилгүй сонсогдож байгаа юм.

Хамгийн гол нь Дээд шүүхийн ерөнхий шүүгч Х.Батсүрэн өргөдлөө өгсөн учир шалтгаанаа огт тайлбарласангүй. Мөн ЕТГ-аас энэ талаар ямар нэг мэдээлэл өгсөнгүй. Бүрхэг үлдэв.

Бүрхэг зүйлийн ард юу байдгийг бүгд мэднэ.

Х.Батсүрэнг Ерөнхийлөгч чөлөөлж, Дээд шүүхийнхэн өмнө нь дэвшээд буцсан  Д.Ганзоригийг дахин сонгож илгээв.

Хэдийгээр өнөөдрийн хуулиар Дээд шүүхийн Ерөнхий шүүгч зөвхөн өөрийн шүүхдээ “ерөнхий” боловч 94 жилийн түүхтэй шүүх байгууллагын “толгой” нь Дээд шүүхийн Ерөнхий шүүгч л байдаг. Тэр утгаараа шүүхийн хамгийн нөлөө бүхий хүн бол Дээд шүүхийн Ерөнхий шүүгч мөнөөс мөн. Шүүхийн “толгой”-г учир битүүлгээр “хөдөлгөж” байна гэдэг ч үүний нотолгоо юм.

Түүнчлэн Дээд шүүхийн Ерөнхий шүүгчийг чөлөөлсөн явдал яг одоо өрнөж буй сонгуулийн үйл явцтай холбоотой болж таарав.

Тэр дундаа ингэж АН-аас авлига, албан тушаал, мөнгө төгрөгний хэрэгт холбогдож, АТГ, прокурор, шүүхэд сэжигтэн, яллагдагчаар татагдсан 12 этгээдийг хамгаалан авч үлдэж буй бололтой.

Хамгийн гол нь АН-ынхөө нөлөө бүхий хүмүүс Монгол Улсад нэн хортой, уршигтай ноцтой гэмт хэрэгт холбогдож сэжигтэн, яллагдагч болтлоо явжээ. Тэдний хэргийг илрүүлэх гэж АТГ, ЭЦГ, прокурорууд ихээхэн цаг хугацаа, хүч чармайлт, хөрөнгө мөнгө гаргаж ажилласан байдаг.

Өнөөдөр Х.Батсүрэнгийн оронд хэн ч Дээд шүүхийн Ерөнхий шүүгч болж мэднэ.

Ванга шиг хэлэх ганц л үнэн бий. Тэр нь юу юм гэвэл АН-аас нэр дэвшсэн сэжигтэн, яллагдагч нар “ногоон гэрэл”-ээр УИХ руу зүтгэнэ. Шүүх саад биш болно. Харин сонгогдож орхивол хэрэг нь цайрна.

Монголчуудын шударга ёсны хүсэмжлэлд томоос том хар цэг тавигдана.

Эцэст нь хэлэхэд, муу хэлээд байдаг Н.Багабанди, Н.Энхбаяр, Ц.Элбэгдорж нарын үед ийм олон сэжигтэн, яллагдагчийг нөмөрлөн хамгаалж төрд зүтгүүлж байсан түүх үгүй юм шүү.