Тахиа гурав донгодоход Баасанхүү гурван удаа урвана гэдэг шиг АН-ын дарга С.Эрдэнэ ямархуу урваач шарваач хүн болохоо гуравхан сарын дотор харууллаа.
Энэ нь коронавирус дэлхийн улс орны өвдгийг чичрүүлж байхад монголчуудын төлөө хамгийн их санаа зовж байсан хүний нэг нь С.Эрдэнэ. Гадаадаас иргэдээ авчрахыг эсэргүүцэж Төрийн ордны индэр дээрээс омог ихтэй мэдэгдсэнээрээ УОК-оор дамжуулж эрх баригч намыг баалах гэсэн санаа байсан. Үүний бүрэн утгыг иргэд ухаж ойлгоогүй учраас С.Эрдэнийг дэмжсэн. Гэтэл үүнээс хэдхэн хоногийн дараа гадаад дахь иргэд санхүүгийн хүндрэлд орлоо гэж ирээд санхүүгийн дэмжлэг үзүүлэх ёстой. Ойролцоогоор 50 мянган орчим иргэнд нь сар бүр 500 ам.доллар олгоё. Улсын төсвөөс хагас жилийн хугацаанд 417.2 тэрбум зарцуулна гэж байв.
Ингэж хоёр удаа гэнэтийн гэмээр мэдэгдэл хийгээд АН-ынхан ичээндээ бүгэв. Яагаад гэдгийг хэн ч гадарлаагүй, хэн ч сонирхоогүй.
Гагцхүү сонгуулийн бэлтгэл ажилдаа орсон байх гэж таамагласан. Гэвч тийм биш байж. Учир нь АН-ын ҮБХ-ны хуралдаанаар гадаад дахь 10 мянган иргэний талаар ярилцжээ. Цахим орчинд тархсан бичлэгээс үзвэл, эдгээр иргэдийг авчир гэж уриалаад ч, битгий авчир гэж орилоод ч АН-д хэрэггүй гэж байх юм. Нэг ёсондоо АН-ынхан ашиг харж байж монголчуудаа аюулт өвчнөөс хамгаалах бололтой. Намын дарга С.Эрдэнэ нь ч гишүүдийнхээ эл саналтай санаа нэгдэж, дэмжсэн бололтой. Тиймдээ ч гэнэтийн хоёр мэдэгдэл хийнгүүтээ ичээндээ бүгсэн шалтгаан нь энэ байж.
Бичлэгт,
ҮБХ-ны гишүүн Ж.Батсуурь: Сонгууль болоход хоёр сар үлдэж. Бид тэдний ажлыг сайжруулах гэж явах хэрэг байна уу. Үүнийхээ оронд ялалтын төлөөх ажил руугаа дайрвал яасан юм бэ. Тэдний ажлыг сайжруулах бидэнд ямар хэрэгтэй юм бэ. Муудвал сайн л биз. Гаднаас 10 мянган ирэх хүсэлтээ гаргаж. Энэ үед бид хурдхан шиг тойргоо тохирох хэрэгтэй. Эцсийн эцэст тамга бидэнд эргэх нь чухал. Тэдний ажлыг сайжруулах гэж явах юм уу, эсвэл нийгмийг дагаж намирч явж байгаад ялалт байгуулах уу.
АН-ын дарга С.Эрдэнэ: За, баярлалаа. Улс төрийн ашиг хонжоогоо харвал Ж.Батсуурьтай санал нэг байна. Үүрэх ёстой хариуцлагаа хүлээгээд явна л биз.
ҮБХ-ны гишүүн П.Дашзэвэг: С.Эрдэнэ дарга хэллээ л дээ. 10 мянган иргэн гаднаас ирвэл нөхцөл байдал хүндэрнэ гэж. Бид эдгээр иргэдийг авчир гэж хэлсэн ч бидэн ашиггүй. Битгий авчир гэсэн ч бидэнд ашиггүй. Ийм нөхцөлд эдгээр 10 мянган хүний талаар дуугарах нь АН-д ашиггүй. Яагаад гэвэл, битгий авчир гээд хэлчихвэл гадааддаа өвчин тусчихдаг. Гэтэл ар гэрийнхэн нь “Эд нар битгий авчир” гээд авчруулаагүй гэвэл яах вэ. 10 мянган ар гэрийнхэнтэй нийлэхээр 30-40 мянган хүн болно. Нийт сонгогчдын бараг хоёр хувь гэсэн үг. Битгий авчир гээд бид хэлчихдэг. Гэтэл “Эд нар битгий авчир гэж хэлж байхад нь бид та нарыг авчирч аварлаа шүү” гэвэл яах вэ. Ингэхээр ирээгүй байсан ч бидэнд ашиггүй, ирсэн байсан ч бидэнд ашиггүй. Тиймээс энэ талаар дуугарах нь хэрэггүй гэж бодож байна.
-С.Эрдэнэ: За, манай Ж.Батсуурьтай адилхан санал хэллээ. Өөр санал хэлэх хүн байна уу.
Энэ бол ҮБХ-ны хуралдааны хэсэгхэн бичлэг. Үүнээс гадна монголчуудыг хэдэн хэсэг хувааж, талцуулах юу ярьсныг бүү мэд.
Ерөөс С.Эрдэнэ гэдэг хүн АН-ыг талцуулж, хэдэн хэсэг тараасан. Үүн шиг ээ, коронагийн хүнд хэцүү энэ цаг үед монголчуудаа мөн л талцуулж сууна.
Яг ийм ярианы дараа АН-ын дарга С.Эрдэнэ ичээндээ бүгэж, гадаад дахь иргэдээ татан авах асуудлаар ганхийгээгүй нь ҮБХ-ны хуралдаанаар хэлэлцэгдсэн саналыг дэмжиж, ухайлсан гэдгээ батлан харуулсан юм. Тэр ингэж л улс орны эрх сонирхол, үндэсний аюулгүй байдал, монгол хүний халдашгүй дархан байдал, эрүүл аюулгүй орчинд амьдрах чухал асуудалд намын болоод амин хувийн явцуухан ашиг сонирхолоор ханддаг байх нь.
Ийм л увайгүй, зөвхөн улс төрийн ашиг хонжоо харагч төрийн эрхийг атгалцахаар УИХ-ын сонгуульд горилж сууна. Түүний хувьд Баянгол дүүргээс хэдэнтээ сонгогдсон дархлагдсан нэгэн. Бараг нь Баянголын эзэн гэх алдар хүртсэн гэхэд болно. Тиймдээ ч дахиад л эл дүүрэгт нэр дэвшсэн.
Харин ҮБХ-ны гишүүн Ж.Батсуурийн хувьд Сүхбаатар аймагт горилж буй. Өнгөрсөн нөхөн сонгуулиар олонхийн санал авч байсан. Ингээд зогсохгүй аймгийн Засаг дарга нараас хамгийн чинээлэгт нь тооцогддог гэх.
Түүний хувьд ч, П.Дашзэвэгийн хувьд ч намын дарга С.Эрдэнээсээ огтхон ч ялгарах юм алга. Гэсэн атлаа ёс суртахуун, үзэл баримтлал, шударга ёс гэж хаа сайгүй ярьж явна. Гайхмаар.
Ингэж л С.Эрдэнэ гэдэг хүний, цаашлаад нам дагасан гишүүдийнх нь багны цаадах үнэн төрх бага багаар ил болж байна. Намын гишүүдээ нэр дэвшихэд нь 100 сая төгрөгийн босго тавьсан. Энэ нь зөвхөн мөнгөтэй нэгэн сонгуульд нэр дэвших боломжийг олгож, мэдлэг чадвартай ч халаас хоосон залуусыг адалсан үйлдэл болсон.
Гэтэл бас л гадаад дахь иргэдээ улс төрийн золигт ийн гаргахаар санаархаж буй нь энэ.
Угтаа бол “эхийг нь эцээж, туглыг нь тураахгүйгээр” бүгдийг нь авчир гээд дуугарсан бол АН-д ч, С.Эрдэнэд ч том оноо авчрах байсан.
Гэвч түүнд иргэн бүрийн амь нас, эрүүл мэндийг хамгаалах, тэдний дуу хоолой болох хүсэл байсангүй. Түүнд зөвхөн эрх мэдэл, ашиг хонжоо чухал байж. Үүнийгээ ч батлан харуулчихлаа. Ийм хүнд, ийм намд Монголын ирээдүйг даатгаж болно гэж үү. Сонгогчид бодох л хэрэгтэй.
Г.Нацаг
Сэтгэгдэл (4)