Монголын төрд нэг мангаа бий. Мангаа ч гэж дээ, уг нь цагтаа Монгол Улсын Төрийн тэргүүнээр заларч, улс орны эцгээр тодорч явсан Н.Энхбаяр гэж хүн. Тэртээ 2012 онд оймсоо гозолзуулснаас хойш хэсэгтээ хорих лагерт хоригдсон, уучлалаар суллагдсан, шүүхдэлцсэн гээд түүний өнгөрсөн бүхэнд үлдээсэн намтарыг монголчууд бараг цээжээрээ мэддэг болсон.
Энэ бүх хугацаанд Н.Энхбаяр гэж хүн сонгуульд өрсөлдөх гэж гурвантаа үзсэн ч гурван удаа хаалга савуулсан. Аргаа бараад эхнэр О.Цолмонгоо өөрийн тойрогтоо нэр дэвшүүлсэн ч "Капитал"-ын Б.Ундармаад хэдхэн саналаар ялагдсан. Дахин давшилж хүү Н.Батшугараа өнөөх тойрогтоо хүч үзүүлсэн. Гэвч "Гараа сайн бол бариа сайн" гэдэг үг түүний хүүд эсрэгээр үйлчлэх шинжтэй болсон.
Яг ийм цаг үед Н.Энхбаярын улс төрийн ирээдүйн карьерийг тодорхойлох шүүх хурлын урьдчилсан хэлэлцүүлэг өнөөдөр 15.30 цагаас болох гэж байна.
Асуудлыг тодруулбал, Н.Энхбаярыг авлига, албан тушаалын хэрэгт нэр холбогдож байсан, цагдан хоригдож байсан гэж УИХ-ын ээлжит сонгуульд нэр дэвших боломжийг нь Сонгуулийн ерөнхий хорооноос хаасан. Гэвч гомдол гаргагчдын зүгээс зөвхөн эд хөрөнгийн маргаан байсан гэсэн тайлбар өгсөн. Үүнийгээ ч Улсын Дээд шүүхийн шийдвэрээр баталгаажуулан тайлбарласан. Эл асуудалтай зэрэгцэн МАХН-тай эвсэж, сонгуульд өрсөлдөж буй бусад нам, төрийн бус байгууллагын тэмцэгчид Сонгуулийн ерөнхий хороо руу дайрч үймээн дэгдээсэн. Тэд Н.Энхбаярыг нэр дэвшүүлэхгүй бол тэмцлийн хурц хэлбэрт шилжиж шууд дайрна гэдгээ ил тод шууд хэлсэн.
Хэрвээ нэр дэвших боломжийг нээх магадлалтай хариу өнөөдөр гарахгүй бол тэмцэгчид бослого гаргаж мэдэхээр дүр зураг хөвөрч эхэлсэн. Магад өмнөх хар түүх давтагдахыг үгүйсгэхгүй.
Ийм зүйл битгий л болоосой. Гэвч өнгөрсөн долоо хоногт өрнөсөн үйл явдлаас харвал тэмцэгчид Н.Энхбаярыг нэр дэвшүүлэхийн төлөө юу ч хийхэд бэлэн байгаагаа зарласан нь эргэлзээ төрүүлж буй.
Н.Энхбаярыг нэр дэвшүүлэх ёстой, үгүйг хэн ч хэлж мэдэхгүй, гагцхүү шүүх мэднэ. Тиймээс шүүхээс ямар шийдвэр гарахаас хамаарч түүний ирээдүйн улс төрийн карьерийн өнгийг тодорхойлно.
Хэрвээ тэрбээр энэ жил нэр дэвшиж чадвал Баянгол дүүргээс сонгогдох нь тодорхой. Дагаад шинээр байгуулагдах парламентад гал гарсан үйл явдлууд ундарч, ширүүхэн тулаан өрнөх нь дамжиггүй. Харин нэр дэвших эрхээ халаасалж чадахгүй бол ирэх жил болох Ерөнхийлөгчийн сонгуульд ч өрсөлдөх боломжоо алдана. Юу үнэн, энэ л үнэн. Тиймээс шүүх хуралдаанаар ямар шийдвэр гарахыг хүлээх л үлдлээ. Тэр боломжоо халаасалж чадах болов уу, эсвэл???
Г.Нацаг
Сэтгэгдэл (5)