Баабар өгүүлжээ. “Ийм гадаад нэртэй хөдөлгөөн үүсээд хоёр жил боллоо. Уг нь сонголт гэсэн утгатай үг л дээ. Төрийн дээд эрх мэдлийг атгаж байгаа Улсын Их Хурлын гишүүдийн байгаа царайг хараад гутсандаа ийм хөдөлгөөн хоёр жилийн өмнө үүсгэсэн юм. Хөдөлгөөнд манай ард түмний бүгдээрээ таньдаг мэддэг ахмад үеийнхэн нэгдсэн. Өөрснөө депутат болох гэсэн юм биш ээ. Тэртэй тэргүй насны хувьд ч ахмад, нийгэмд хийдгээ хийсэн, шударга явсан, хэн нь ч ард олон төр засагтаа үнэлэгдсэн, хэний ч өмнө нүүр улайхгүй хүмүүс” https://ikon.mn/n/1wfb гэж.
Юун тухай яриад байгаа нь мэдээж ойлгомжтой. Тэр нь “Электорат” хөдөлгөөн.
Одоогоос жил гаруйн өмнөхөн Монголын төр, нийгмийн зүтгэлтнүүд нэгдэж, УИХ-ын сонгуульд нэр дэвших хүмүүсийг бодлогоор дэмжих зорилгоор уг хөдөлгөөнийг байгуулснаа зарлаж, албан ёсоор үйл ажиллагаагаа эхлүүлж байлаа. “Электорат” нь УИХ-ын сонгуульд нэр дэвшүүлэх субъект биш гэдгийг үүсгэн байгуулагчид тухайн үедээ тодотгож байсан юм. Харин УИХ-ын сонгуулийн 76 тойрогт өрсөлдөж болохуйц хүмүүсийг олон нийтээр бүтэн жилийн турш хэлэлцүүлж, шалгуурт нийцсэн төлөөллийг шалгаруулж, дэмжинэ гэдгээ илэрхийлж байв.
Гэвч “Электорат”-уудын нэрийн өмнөөс өөрсдийгөө УИХ-ын сонгуульд нэр дэвшүүлэн, сойсон зарим нэр дэвшигчдийн үйлдэл Баабар тэргүүтэй үндэслэгчдийн эгдүүцлийг төрүүлж эхэлсэн бололтой.
Тэдгээр нь Хөдөлмөрийн Үндэсний нам буюу ХҮН-ын Удирдах зөвлөлийн дарга Т.Доржханд нар.
Хуульд заасны дагуу өнгөрсөн сарын дундуур ХҮН, МСДН, Ёс зүй намын “Зөв хүн Электорат эвсэл”-ээс 2020 оны УИХ-ын сонгуульд нэр дэвшигчдээ зарласан. Тэр дагуу хуульд нийцэж байгаа эсэхийг Сонгуулийн ерөнхий хорооноос нягталж, улмаар нэр дэвшигчдэд батламжийг нь гардуулсан билээ.
Сонирхолтой нь, “Зөв хүн Электорат эвсэл”-ээс нэр дэвшигч Т.Доржхандыг “Электорат”-уудын зүгээс албан ёсоор дэмжих хүнээр тодруулсангүй. Энэ тухай нийтлэлч Баабар хоёр хоногийн өмнө бичсэн “Электорат хөдөлгөөн уриалж байна” гарчигтай нийтлэлдээ тодорхой дурджээ. Нэг үгээр “Зөв хүн Электорат эвсэл”-ээс УИХ-ын сонгуульд нэр дэвшүүлэхээр болж, Сонгуулийн ерөнхий хорооноос батламжаа гардсан хүмүүсийн дундаас МАН-ын 21, ХҮН-ын 15, АН-ын 14, МСДН-ын 13, бие даагчдаас 5, Зүй ёс намаас 5, Гэр хорооллын нам, МАХН, ШИНЭН-аас тус бүр нэг нэр дэвшигчийг дэмжиж буйгаа Баабар албан ёсоор илэрхийлсэн нь энэ байв.
ХҮН, МСДН, Ёс зүй намын нэгдэл болох “Зөв хүн Электорат эвсэл”-ээс нэр дэвшүүлсэн горилогчдын дийлэнх нь Баабар нарын “Электорат”-уудын санаанд нийцээгүй хэрэг.
Цаашлаад нэгэнт дэмжлэг хүлээгээгүй тэднийг бодлогоор дэмжихгүй гэсэн үг. Гэхдээ зөвхөн Баабар тус хөдөлгөөнийг сонгуулийн тугаа болгон нэрээ дэвшүүлсэн нэр бүхий хүмүүст эгдүүцээд байгаа юм биш. Соёлын гавьяат зүтгэлтэн, шог зураач С.Цогтбаяр ч энэ тухай хэд хоногийн өмнө өөрийн байр сууриа илэрхийлж байлаа. Тэрбээр "Өөрийн биеэр оролцож буй "Электрат" хөдөлгөөнөөс эцэслэж гаргасан нэрсийн жагсаалтыг хараад хоорондоо холбоо уялдаа холбоогүй, эсрэг тэсрэг хоёр сэтгэгдэл төрлөө.
Нөгөө талаас нь үзвэл мэдээж миний хувь хүнийхээ хувьд "Зөв хүн" гэж хүлээн зөвшөөрөхийн аргагүй хүмүүсийн нэрс орсон нь мэдээж бухимдал төрүүлснийг хэлэх хэрэгтэй.
"Электрат хөдөлгөөн"-ний сүүлийн 7 дугаар чуулган дээр ч энэ асуудал дээр нэлээдгүй маргаан гаргаж мэтгэлцэж байсан. Бүгдийг нь санал нэгтэй баталсан уу гэвэл бас үгүй. Нийт гишүүдийн маань ихэнхи хэний ч үг ятгалгад автахааргүй өөрийн гэсэн үзэл бодолтой эрхмүүд. Уг нь энэ жагсаалт зөвшилцөж дийлэн олонхийнх нь саналаар гарсан шийд. Гэхдээ дундуур нь бас хор түрхсэн шившлэгтэй сум гүйчихэв үү ч гэж хардмаар" хэмээн эгдүүцэж байсан удаатай.
Баабар хэлжээ, "Нэр дэвшигчид "Электорат" хөдөлгөөнөөр хэлцэгдэн баталгаажсан тул өөр нэр хуурамчаар орлуулах нь сонгогчдыг мэхлэж, бидний нэр төрд халдаж буй хэрэг юм" гэж. Үүгээр төр, нийгмийн зүтгэлтнүүдээс бүрдсэн "Электорат" хөдөлгөөнөөс дэмжлэг хүлээж сонгуульд нэр дэвшихээр болсон хэмээн сурталчилж яваа Т.Доржханд нар хууран мэхлэгчид болж таарах нь.
Г.Сөрөлт
Сэтгэгдэл (62)