УИХ-ын ээлжит сонгуульд тойрог буюу Хөвсгөл аймагт АН-аас нэр дэвшиж буй хотын дарга асан Э.Бат-Үүл энэ сарын 7-нд тойргийнхоо сонгогчидтой уулзалт хийлээ.

Энэ үеэр тэрбээр "Намайг Монгол Улсын баатар Э.Бат-Үүл гэж зарладаг. Би нэг зүйл залруулж хэлье. Миний энгэр дээрх тэмдэг бол баатрын тэмдэг. Гэхдээ энэ бол миний тэмдэг биш, Монгол Улсад ардчилсан хувьсгалыг хийсэн партизан, ардчиллын гишүүд, АН-ынханы, ардчиллыг дэмжсэн монгол түмний тэмдэг юм. 

Энэ тэмдгийг Ерөнхийлөгч надад өгөхдөө яг ингэж хэлсэн. Ингэхдээ "Би үүнийг чамд өгөөгүй юм шүү. Бүгдэд нь өгч чадахгүй учраас чамайг төлөөлөл болгож зүүж өгч байна" гэж хэлсэн юм. Би нэр хүндийг даасандаа баярлаж явдаг.

"Та нарын тэмдэг Э.Бат-Үүлд яваа юм шүү" гэж дуудах байтал баатар Э.Бат-Үүл гэж дуудах юм. 

Миний сонгуулийн ажилд хань минь хамт яваа. Би Мөрөнг үзүүлнэ гэж хэлсэн амандаа хүрч бид хамтдаа ирлээ. Нэг дурсамж хуваалцахад би 43 жилийн өмнө сургуулийн дотуур байрны барилга дээр ангийнхантайгаа ажиллаж байлаа. Тухайн үед ангийн даргаар Монгол Улсын Ерөнхий сайд асан Н.Алтанхуяг байлаа.

Би хайртай бүсгүйгээ санаад болдоггүй. Ангийн дарга Н.Алтанхуягт хэлтэл чөлөө өгсөн. Тэгж Сэлэнгэд байгаа гэргий дээрээ очиж билээ. Үүний дараа наадмын үеэр нэг залуугаас морийг нь гуйж уналаа. Өмнө нь морь унаж үзсэн биш. Хурдан морьд давхиад иртэл нөгөө морь чинь хөөрчихсөн. Би ч айгаад бараг чацга алдангаа алдсан. Мөрөнгийн залуучууд хөөж байж арай хийж морь тогтоож авч байлаа. Ийм л түүхтэй, дурсамжтай газартаа нэр дэвшихээр ирлээ. 

Би зориуд нэг зүйл хэлэхэд нэг нэгнээ араас нь битгий муул. Тэгэхгүй араас нь худлаа муулах юм. Уг нь Ерөнхий сайд энд сууж байсан бол асуух зүйл их байна" гэсэн байна. 

Ташрамд дурдахад, Чингэлтэй дүүргийн Эрүүгийн хэргийн анхан шатны шүүх Э.Бат-Үүл нарын 11 хүнд холбогдох эрүүгийн хэргийг энэ 8-ны өдрийн 10:00 цагт хянан хэлэлцэхээр товлосон байсан юм. Гэвч шүүгчдэгчийн талаас гаргасан хүсэлтийн дагуу шүүх хурлыг УИХ-ын сонгуулийн дараа буюу энэ сарын 29-ний өдрийн 10:00 цаг хүртэл хойшлуулж, шүүгдэгч нарт авсан хувийн баталгаа гаргах таслан сэргийлэх арга хэмжээ, хязгаарлалт тогтоох таслан сэргийлэх арга хэмжээг тус тус хэвээр үргэлжүүлэхийг шүүхээс шийдвэрлэсэн юм.