Ерөнхий сайд асан Ж.Эрдэнэбатыг цагдан хорих захирамжийг Сүхбаатар дүүргийн Эрүүгийн хэргийн анхан шатны шүүхээс энэ сарын 11-нд гаргасан. Түүнийг шүүхийн тусгай дансанд 10 тэрбум төгрөгийн барьцаа байршуулуулухаар “үүрэгдсэн” ч биелүүлээгүй учир цагдан хорихоор болсон юм.

МАН Засгийн эрхэнд үнэмлэхүй олонхи болсны дараа Ж.Эрдэнбатыг Ерөнхий сайдад нэр дэвшүүлэн, томилуулсан байдаг.

Хэдийгээр 2017 онд Ж.Эрдэнбатын тэргүүлсэн Засгийн газар огцорч, өнөөдрийг хүртэл хугацаанд сул гишүүнээр явсан түүний хувьд 2020 оны УИХ-ын сонгуульд Сэлэнгэ аймагт дахин намаасаа нэр дэвшихээр болоод байсан юм.

Ж.Эрдэнэбатаас 10 тэрбум төгрөгийн барьцаа шаардан шүүгчийн шүүгчийн захирамжийн дагуу цагдан хорьсон нь өнөөдрийг хүртэл шүүх байгууллага руу чиглэсэн шүүмжлэл, хардлагыг улам өдөөгөөд байгаа юм.

Өөрөөр хэлбэл, УИХ-ын гишүүний халдашгүй бүрэн эрх нь дуусгавар болоогүй хүнийг, тэгэхдээ Сонгуулийн ерөнхий хорооны зөвшөөрөлгүйгээр цагдан хорьсон нь эрх бүхий зарим хүнээс өгсөн тушаал, үүргийн дагуу гүйцэтгэсэн ажиллагаа хэмээн хардахад хүргээд байна.

Тэгвэл Ерөнхий сайд асан Ж.Эрдэнбатыг цагдан хорьсонтой холбогдуулж Хүний эрхийн үндэсний комиссын дарга асан Ж.Бямбадорж мэдэгдэл хийхээр болжээ. Эх сурвалжийн хэлж буйгаар маргааш товлосон Ж.Эрдэнэбат нартай холбоотой шүүх хурлын үеэр тэрбээр хүний эрх, УИХ-ын гишүний халдашгүй байдалтай холбогдуулан мэдэгдэл хийхээр болсон бололтой.

Г.Эрхэс