Дэргэд нь зогсоод сонсож, уулзалт бүрт нь хамт байгаагүй учраас Н.Номтойбаярыг УИХ-ын гишүүн, Засгийн газрын гишүүн байхад Ардын намын залуучууд хэрхэн тойрон хүрээлж, түүнд тал засч явсныг шууд хэлэх боломжгүй. Мандаж явахад нь түшиж, тулж, унахад нь өшиглөж, зайгаа барьдаг нь өөрөө улс төрд бичигдээгүй хууль болохоор хамгийн ойр явсан хүмүүс нь л энэ тухай гадарлана, тоймтой үг унагаана.

Ийм нэгэн цаг хугацааны хайчин галд орж, улс төрд нөхөрлөл гэхээсээ эрх ашгийн ойлголт жинтэй байр суурь эзэлдгийг хамгийн сайн мэдэрч яваа хүн нь Н.Номтойбаяр.

Эртэй, бяртай, эрх мэдэлтэй явахад түүнийг тойрон хүрээлэх нэгэн олон байсан нь мэдээж. Харин өнөөдөр хуулийн байгууллагаас сэжигтнээр дуудагдаж, шүүгчийн алх дуугарах мөчид түүний талд зогсож, гартай гавтай хорих анги руу ачигдсан Н.Номтойбаярыг өмгөөлж дуугарах хүн олдсонгүй, бараг байсангүй. Сүүлд Ардын намаас мэдэгдэл гаргасныг эс тооцвол, Н.Номтойбаяр шүүгчийн алхтай "гав"-наас өөрцгүй үлдсэн мэт. Нэгэн цагийн хамтрагч, оройлон дэмжиж явсан нь ч түүнийг орхиж, мартжээ.

Үзэл бодлоо илэрхийлэх нь Ардчилсан нийгмийн үнэт зүйл, амин сүнс атал өөрсдийнх нь эрх ашгийг зөрчсөн үү, эсвэл Намынхаа хайрцагт орсон уу хэлж мэдэхгүй Н.Номтойбаяр хэмээх нэр тойрон хүрээлж асан хамтрагчдынх нь дунд замхарч эхэлжээ.

Хан-Уул дүүрэгт бие даан нэр дэвших эрхийг нь Сонгуулийн ерөнхий хорооноос баталгаажуулсан ч цагдан хорих 461 дүгээр ангид хоригдож байгаа Н.Номтойбаярыг чиглэсэн акц үүгээр дуусгавар болсонгүй. “Мунзуй” хочит Г.Нямдорж хэвлэлийнхнийг “багшруулж” байгаад мэдэгдэл хийв. Улмаар Н.Номтойбаярын нэр дэвшиж байгаа Хан-Уул дүүргийн сонгогчдод 30 мянган захиа илгээхээ мэдэгдлээ.

“Мунзуй” Г.Нямдорж, Н.Номтойбаяр нарын хооронд ямар эрх ашгийн зөрчил байдаг, хэзээнээс хэрхэн үүссэн нь тодорхойгүй ч сонгуулийн халуунд дуниартсан сонгогчдод ямар нэгэн эргэлзээ, хардлага зэрэг төрүүлсэн нь мэдээж.

Сонирхолтой нь, хорихоос бие даан нэр дэвшиж байгаа түүний хувьд тойргийнхоо сонгогчдод хандан захидал илгээжээ. Хорихоос бичсэн түүний захидлын агуулга Засгийн газрын сайд, гишүүн байхад нь хамтарч, нөхөрлөж явсан ч улс төрийн замналынх нь хүрээнд Намаас гаргасан шийдвэрийн дагуу өөрөөс нь нүүр буруулсан залуучууд руу чиглэж, ханджээ.

Саяхан л түүнийг тойрон хүрээлж, тойглож явсан залуучуудаа тэрбээр ийн эргэн “санажээ”. Бас сануулсан бололтой.

Үүгээр зогсохгүй “Нууц задалсан ном” нэртэй номоо удахгүй бичиж дуусган олон нийтэд хүргэхээ илэрхийсэн байна. Ийнхүү гартаа гавтай өдөр хоногийн өнгөрүүлэх болсон Н.Номтойбаяр сонгуулийн сурталчилгааны энэ өдрүүдэд зүгээр суухыг хүсээгүй бололтой. Харин өөр рүү нь чиглэсэн "Мунзуй" Г.Нямдорж тэргүүтэй хүмүүсийн эсрэг холбогдох хариуг нь барьж эхэллээ. Гагцхүү эрх мэдэлтэй явахад нь тойрон хүрээлж явсан ч нүүр буруулсан Намын залуучуудаасаа амыг нь асуухаар болсон Н.Номтойбаярын "Нууц задалсан ном"-д хэний тухай, юу гэж дурдах нь нийгэм, улс төрийн хүрээнд хүлээлт үүсгээд байна.

Г.Эрхэс