АН-аас дараагийн Засгийн газрын тэргүүн болон сонгуулийн явцын талаар мэдээлэл хийлээ.

Намын дарга, УИХ-ын гишүүн С.Эрдэнэ “АН энэ сонгуульд амжилттай оролцоно гэсэн зорилготой орсон. Энэ зорилгынхоо хүрээнд амжилттай оролцож байна. Бид улс орны нийгэм, эдийн засаг хүнд байдалтай байгааг мэднэ. Өнөөгийн эрх баригчдын хувьд сонгууль болон бусад үйл явдлаар далимдуулж нийгэм, эдийн засгийн байдлыг орхигдуулж байна.

Засгийн газар ямар ч нөхцөл байдал үүссэн өөрийн чиг үүргээ тасралтгүй үргэлжлүүлэх үүрэгтэй. Харамсалтай нь улс орны гадаад нэр хүнд туйлын хүнд байна. Хар тамхитай холбоотой асуудлаар олон улсын анхаарлын төвд байна.

Ийм цаг үед улс орны нөхцөл байдлыг дүгнэж, АН энэ сонгуульд олонх болох нь ойлгомжтой гэж харж байна. Сонгуулийн үр дүнгээр байгуулагдах Засгийн газрын бүтцийн талаар хэлэлцсэн. Засгийн газрыг хэн тэргүүлэх асуудлаар хэлэлцэж, дараагийн Ерөнхий сайдад Р.Амаржаргалыг нэр дэвшүүлж байна" гэлээ. 

А.Сүх