Ардчилсан нам 2020 оны УИХ-ын сонгуульд олонхи болбол С.Эрдэнийг биш Р.Амаржаргалыг Ерөнхий сайд болгоно хэмээн мэдэгдлээ. АН-ын дарга С.Эрдэнийн амнаас унасан эл үг ирэх өдрүүдэд явах сонгуулийн сурталчилгааны гол акц болох нь тодорхой, Ардчилсан нам талаасаа шүү дээ. С.Эрдэнэ дарга ч Р.Амаржаргалыг Ерөнхий сайд болгоно гэсэн үгийг зүгээр ч нэг ам нь халаад хэлээгүй бололтой.

Харин өөрийг нь чиглэсэн бараан мэдээлэл, шүүмжлэл, хардлага, хуулийн байгууллагаар шалгуулах хэд хэдэн асуултад ийнхүү хариулт өгчих шиг боллоо. 

Угтаа бол тавдугаар сарын 25-наас хүчин төгөлдөр мөрдөж эхэлсэн Үндсэн хуулийн нэмэлт, өөрчлөлтийн хүрээнд Засгийн газрын гишүүдээ томилох, чөлөөлөх, огцруулах эрх мэдлийг Ерөнхий сайдад олгохоор болсон. Нэг үгээр, гүйцэтгэх засаглалын тэргүүнээс эхлээд Засгийн газрын гишүүн болгоныг нэгбүрчлэн парламентаар шүүн дэнсэлж, томилж ирсэн уламжлалыг халж Ерөнхий сайд өөрөө мэдэх эрхийг нь олгосон юм.

Үүгээр энэ удаагийн сонгуулийн гол өрсөлдөөн нэр дэвшигчдээс гадна дараагийн Ерөнхий сайд хэн байх вэ? гэсэн шалгуур, шаардлагын хүрээнд болж буйгаараа онцлог.

МАН ялбал У.Хүрэлсүх, АН олонх болбол С.Эрдэнэ Ерөнхий сайд болно гэсэн үг. Сонирхолтой нь, сонгуулийн санал авах өдрөөс долоо хүрэхгүй хоногийн өмнө АН-аас хийсэн мэдэгдлийн хүрээнд С.Эрдэнэ Ерөнхий сайдын албыг хаших чадамжгүйгээ илэрхийлсэн нь энэ.

Нэг ёсондоо С.Эрдэнэ цагаан тугаа өргөчихлөө. Сонгуулийн дараа Намын даргын албан тушаалаа өгөхөө ч мэдэгдчих шиг боллоо. Үүнийгээ Р.Амаржаргалыг Ерөнхий сайдад нэр дэвшүүлж "зөөллөв".

Тэрбээр "Засгийн газрыг хэн тэргүүлэх вэ гэдэг асуудлыг авч хэлэлцсэн. Удирдах бүрэлдэхүүний төвшинд ярилцаад дараагийн засагт АН олонхи болсон тохиолдолд Ренчиннямын Амаржаргалыг Ерөнхий сайдад нэр дэвшүүлж, ажиллуулах нь зүйтэй юм гэсэн саналыг хүлээн авсан" гэв.

Уг нь эрхэлж байгаа албан тушаал, удирдаж буй Намынх нь Үндсэн дүрэмд УИХ-ын сонгуулийн үр дүнгээр ялалт байгуулбал шууд Ерөнхий сайд болох хүн нь С.Эрдэнэ.

Гэвч Р.Амаржаргалын нэрийг Ерөнхий сайдад нэр дэвшүүлсэн нь АН-ын тактик байж болох ч сонгуулийн үр дүн хэрхэн гарахаас үл хамаарч С.Эрдэнэ өөрийгөө, Намынхаа дүрмийг үгүйсгэсэнд асуудлын зангилаа оршиж байна. 

Г.Эрхэс