НИТХ-ын дарга, нийслэлийн МАН-ын хорооны дарга асан Ц.Сандуйгийн 2020 оны сонгуульд нэр дэвших эрхийг нь шүүхээс сэргээжээ. Энэ тухай Шүүхийн ерөнхий зөвлөлөөс өнөөдөр хийсэн мэдээллийнхээ үеэр дурдсан байна.

Ц.Сандуй нарыг төрийн эрхийг хууль бусаар авах гэж оролдсон “60 тэрбум”-ын гэх хэрэгт холбогдуулж, анхан шатны шүүхээс дөрвөн жилийн ял ногдуулсан юм. Харин Давж заалдах шатны шүүх хурлаас уг шийдвэрийг хэрэгсэхгүй болгож, хэргийг мөрдөн байцаалтад буцааж, Ц.Сандуй нарыг батлан даалтад гаргаад байсан билээ.

Үүнтэй холбогдуулж, Ц.Сандуй энэ удаагийн сонгуульд Ногоон намаас Сонгинохайрхан дүүрэгт нэр дэвших хүсэлтээ Сонгуулийн ерөнхий хороонд хүргүүлсэн ч түүнийг бүртгэхээс татгалзсан хариу өгсөн юм. Ийнхүү НИТХ-ын дарга асан Ц.Сандуйгийн нэр дэвших эрхийг хязгаарласан Сонгуулийн ерөнхий хороонд холбогдох хэргийг шүүхээс шийдвэрлэснээр түүний сонгуульд оролцох эрх нь нээгдэж байна.

Тодруулбал, Ц.Сандуйгийн нэхэмжлэлтэй “Сонгуулийн ерөнхий хорооны 2020 оны тавдугаар сарын 26-ны өдрийн 176 дугаар тогтоолыг хүчингүй болгож, нэр дэвшигчээр бүртгэхийг Сонгуулийн ерөнхий хороонд даалгах” шаардлага бүхий нэхэмжлэлийг шүүх өнгөрсөн тавдугаар сарын 28-ны өдөр хүлээж авч, нэр дэвших эрхийг ийн сэргээсэн байна.

С.Сүлд