Ж.Эрдэнэбат, С.Баярцогт, Э.Бат-Үүл, Д.Эрдэнэбат гээд Сэлэнгэ аймгийнхан үе үеийн парламентад төлөөллөө илгээж иржээ. Тэдний сонголтын үр дүнд Ерөнхий сайд, Сангийн сайд, хотын дарга бүр Улсын баатар хүртэл төржээ. Нэг үгээр, тус аймгаас төр түшихээр сонгогдсон хэн нэгэн тодорхой албан тушаал хашиж ирсэн нь дээрх жишээнээс харагдана.

Гэвч тус аймагт нэр дэвшигчид эхнээсээ шүүхийн хаалга татаж, түрүүчээсээ цагдан хоригдсон нь олны анхаарлын төвд ороод байна. Хамгийн эхнийх нь Ерөнхий сайд асан Ж.Эрдэнэбат. Түүний хувьд Сэлэнгэ аймгаас тэр дундаа Мандал сумаас төрсөн анхны гүйцэтгэх засаглалын тэргүүн.

Гэвч Ерөнхий сайдаар ажиллаж байхдаа тусгай зөвшөөрөл дамлан зарсан гэх үндэслэлээр хуулийн байгууллагад шалгуулж, шүүгчийн шийдвэрээр цагдан хоригдоод байгаа юм.

Угтаа бол сумандаа төдийгүй Сэлэнгэ аймагтаа рейтинг өндөр яваа нэр дэвшигч нь Ж.Эрдэнэбат. Хачирхалтай нь, сонгуулийн сурталчилгаа өндөрлөх тийш хандсан энэ өдрүүдэд 29 дэх Ерөнхий сайдыг цагдан хорьсон нь иргэдийн эгдүүцлийг төрүүлээд байна.

Түүний араас “явах”-аар нэрлэгдээд байгаа өөр нэг хүн нь Аж үйлдвэрийн сайд асан Д.Эрдэнэбат. Нэгэн цагт АН-ын ерөнхий бичгийн даргын албан тушаалыг хашиж, УИХ-ын гишүүнээр сонгогдон Засгийн газрын гишүүний албыг хүртэл хашиж ирсэн Д.Эрдэнбатыг “Эрдэнэт” үйлдвэрийн 49 хувийн хувьцааг Монголын тал худалдан авсан хэрэгт холбогдуулан шалгаж эхлээд байгаа юм.

Үүгээр зогсохгүй Сангийн сайд асан С.Баярцогтыг ч оффшор, Оюу Толгойн гэрээний асуудалд холбогдуулан шалгаж эхлээд буй.

Хамгийн сонирхолтой гэмээр эргэлзээ төрүүлэм асуудал нь Ерөнхий сайд асан, УИХ-ын гишүүний халдашгүй бүрэн эрх нь дуусгавар болоогүй байхад парламентын зөвшөөрөлгүйгээр Ж.Эрдэнэбатыг цагдан хорьсон нь алсуураа АН-аас нэр дэвшигч, түүнтэй дөрвөн жил хууль боловсруулсан Д.Эрдэнэбатыг ч саатуулж мэдэх сэмиж, сануулгыг өгсөн бололтой.

Шүүхээс гэм буруутайг нь тогтоогоогүй байхад баривчилж, саатуулах нь хуулиар хориотой ч Ж.Эрдэнэбатыг цагдан хорьсон үндэслэл нь өөрөө С.Баярцогтыг хэзээ ч, магадгүй сонгуулийн хугацаанд саатуулж мэдэх хардлагыг төрүүлж байгаа юм.

Өөрөөр хэлбэл, Ж.Эрдэнэбатын араас Д.Эрдэнэбат, С.Баярцогт гэсэн рейтинг өндөртэй гурван нэр дэвшигч шүүхийн шийдвэр гарч, шүүгчийн алх дуугарах мөчид саатуулагдах эсэх нь цаг хугацааны асуудал болж байна. 

Нөгөөтэйгүүр, сонгуулийн сурталчилгааны үеэр өрсөлдөгчөө харлуулдаг, гүтгэдэг байдал улам "албажиж" бүр цагдан хориулдаг жишиг энэ удаагийн сонгуулиар ийнхүү тогтож байх шиг. 

Ташрамд дурдахад, 2020 оны УИХ-ын сонгуульд Сэлэнгэ аймагт МАН-аас Ж.Эрдэнэбат, Д.Өнөрболор, Ч.Ундрам, АН-аас С.Баярцогт, Д.Эрдэнэбат, Д.Үүрийнтуяа нар өрсөлдөж байгаа юм. 

Г.Эрхэс