НИТХ-ын дарга, нийслэлийн МАН-ын хорооны дарга асан Ц.Сандуйгийн 2020 оны сонгуульд нэр дэвших эрхийг нь шүүхээс сэргээсэн билээ. Тэгвэл өнөөдөр нэр дэвших тогтоолоо гардан авлаа. 

Ц.Сандуй нарыг төрийн эрхийг хууль бусаар авах гэж оролдсон “60 тэрбум”-ын гэх хэрэгт холбогдуулж, анхан шатны шүүхээс дөрвөн жилийн ял ногдуулсан юм. Харин Давж заалдах шатны шүүх хурлаас уг шийдвэрийг хэрэгсэхгүй болгож, хэргийг мөрдөн байцаалтад буцааж, Ц.Сандуй нарыг батлан даалтад гаргаад байсан билээ.

Үүнтэй холбогдуулж, Ц.Сандуй энэ удаагийн сонгуульд Ногоон намаас Сонгинохайрхан дүүрэгт нэр дэвших хүсэлтээ Сонгуулийн ерөнхий хороонд хүргүүлсэн ч түүнийг бүртгэхээс татгалзсан хариу өгсөн юм. Ийнхүү НИТХ-ын дарга асан Ц.Сандуйгийн нэр дэвших эрхийг хязгаарласан Сонгуулийн ерөнхий хороонд холбогдох хэргийг шүүхээс шийдвэрлэснээр түүний сонгуульд оролцох эрх нь нээгдэж байна.

Энэ талаар тэрбээр “Өнөөдөр 2020 оны зургадугаар сарын 16-ны өдөр шүүхээс нэр дэвшихийг зөвшөөрсөн тогтоолоо гардаж авлаа. Монголын шүүх байгууллага асуудлыг зөвөөр харж шударга шийдвэр гаргасанд талархаж байна.

Дөнгөж сая Сонгуулийн ерөнхий хороо руу нэр дэвших хүсэлтээ баталгаажуулах хүсэлтээ дахин өглөө. СЕХ шүүхийн шийдвэрийг биелүүлж миний нэр дэвших мандатыг өгнө гэдэгт итгэлтэй байна" гэжээ.