Эдийн засагч Л.Наранбаатар АН-ын даргын ахлах зөвлөх З.Энхболдыг амалж, нэг тойрогт нэр дэвшихээ зарлаад байсан. Тэдний хооронд өрнөсөн маргааны сэдэв нь Таванттолгой. Үргэлжлийг Их хурлын сонгуулиар шийдэх учиртай байсан. Гэвч сонгуулийн марафонд оролцогчдын жагсаалтаас Л.Наранбаатар яагаад ч юм бэ, сугарч үлдэв. Далаараа цэвэр тавиулсан тэрбээр шүүхэд нэхэмжлэл гаргаж, нэр дэвшихээр хичээсэн. Гэвч шүүхээс түүний нэхэмжлэлийг хэрэгсэхгүй болгох шийдвэрийг өнөөдөр гаргалаа.

Тодруулбал, “Сахигтун! Үндсэн хуулийн 19” эвслээс нэр дэвшихээр материалаа Сонгуулийн ерөнхий хороонд өгөөд байсан түүнийг хоёр газраас нэр дэвшихээр хүсэлт өгсөн учир нэр дэвшүүлэх боломжгүй гэж Сонгуулийн ерөнхий хорооноос үзсэн юм. Учрыг ухвал, "Зөв Хүн Электорат эвсэл”-ээс түүнд санал тавьж, тэр татгалзаж.

Гэтэл яагаад ч юм бэ, тус эвслээс түүний нэрийг СЕХ-нд хүргүүлсэн болж таарсан. Ингэж л Л.Наранбаатар нэр дэвших боломжгүй бол, цаашлаад шүүхэд гомдол гаргаад байсан нь энэ. Цөөнгүй хоног үргэлжилсэн маргаанд Захиргааны хэргийн давж заалдах шатны шүүхээс цэг тавьсан нь энэ. Одоо түүнд Дээд шүүхэд хандах боломж бий. Гэхдээ хуулийн процессоос үзвэл, УИХ-ын ээлжит сонгуулийн санал хураалтаас өмнө амжих магадлал бараг байхгүй. Энэ утгаараа Л.Наранбаатар ирэх 2024 оны ээлжит сонгуулийг хүлээж, биеэ нөөх хэрэгтэй болж байх шиг байна.

Хамгийн гол нь "Зөв Хүн Электорат эвсэл"-ээс Л.Наранбаатар үнэхээр нэр дэвшинэ гэсэн болохоор нь материалыг нь СЕХ-нд хүргүүлэв үү, эсвэл энд ямар нэг "но" орчих вуу гэж хардахаар байна.

Тиймдээ “Зөв Хүн Электорат эвсэл”-ийг шүүхэд өгөхөө шүүхийн эл шийдвэр гарахаас өмнө Л.Наранбаатар мэдэгдэж байсан юм. Хэрвээ тус эвслээс санаатайгаар Л.Наранбаатарын нэрийг өгсөн болж таарвал улс төрийн бохир тоглолт энд явсыг батална. Харин эсрэгээрээ бол тэрбээр тодрох гэсэн, эс бөгөөс нөөц төлөвлөгөөтэй сонгуульд өрсөлдөх гэсэн санаархал агуулсан болж таарна. Аль нь ч бай, “Зөв Хүн Электорат эвсэл”-ийг шүүхэд өгөх эсэхээс асуулт тодорхой болно. Гол нь Л.Наранбаатар дахин шүүхэд хандах болов уу.

Г.Маргад