Экс Ерөнхийлөгч Н.Энхбаярыг авлига, албан тушаалын хэргээр ял эдэлж байсан, үгүй гэдэг маргаанд эцэс тавьж чадалгүй цөөнгүй жилийн нүүр үзэв. Тиймдээ ч энэ удаагийн сонгуульд нэр дэвших боломжоо хасуулж, хүү Э.Батшугараа Сонгинохайрхан дүүрэгт МАХН-аасаа сойж буй билээ.

Н.Энхбаярын хувьд Баянгол дүүрэгт нэр дэвшихээр хүсэлтээ өгсөн. Хэрвээ түүний эл хүсэлтийг СЕХ хүлээж авсан бол Баянгол дүүрэгт гал гарсан өрсөлдөөн болох байлаа.

Нэг үгээр хэлбэл, Баянгол дүүрэгт дархлагдсан гишүүд болох АН-ын дарга С.Эрдэнэ тэргүүтэй гишүүдэд халтай сонгууль болох нь дамжиггүй байсан. Гэвч азаар гэх үү,  эзээр гэх үү, Н.Энхбаяр цагдаагийн байгууллагын тодорхойлолтоор ял шийтгэл эдэлж байсан болж таарснаар СЕХ хаалт хийхдээ тулсан юм.

Энэ ч үүднээс экс Ерөнхийлөгч шүүхэд нэхэмжлэл гаргасан. Тэгсэн атлаа шүүхийн урьдчилсан хэлэлцүүлэгт өөрөө очоогүй том толгойлсон. Ингээд энэ сарын 19-нд буюу энэ долоо хоногийн баасан гарагт түүнийг сонгуульд өрсөлдөх эсэхийг эцэслэн шийдэх шүүх хурал болох ёстой.

Гэтэл МАХН-ын дарга тэрбээр дэмжигчдээ уриалсан нэгэн мэдээллийг хийлээ.

Энэ нь тус намын Ерөнхий нарийн бичгийн дарга Б.Тулга “Шүүхээс маш ойлгомжтой шийдвэр гарах ёстой. Учир нь ЦЕГ-аас Н.Энхбаярыг ял шийтгэл эдэлж байсан гэдэг худлаа тодорхойлолт гаргаж өгсөн. Монгол Улсад хүчин төгөлдөр үйлчилж буй хуулиар Улсын Дээд шүүхийн шийдвэр эцсийн байх зохицуулалттай. Гэтэл анхан шатны шүүхийн шийдвэрээр Н.Энхбаярын нэр төрд халсан. Энэ асуудал ирэх баасан гарагт эцэслэгдэн шийдэгдэнэ.

Тиймээс Баянголчууддаа, Монголчууддаа хандаж хэлэхэд МАХН-ын дарга Н.Энхбаяр нэр дэвших эрх нээлттэй боллоо. Манай намынхан одоо идэвхтэй ажилцгаах ёстой” гэсэн юм.

Харин МАХН-ын дарга Н.Энхбаяр “Намайг сонгуульд нэр дэвших эсэхийг шйидэх шүүх хурал зарлагдсаныг ард иргэд сонсоод алгаа ташиж хүлээж авсан. Тиймээс Монгол Улс даяараа “Та бидний эвсэл”-ийг дэмжиж буй ард иргэддээ баярлалаа. МАНАН арилж, нар мандахыг энэ сарын 19-нд шийднэ. Сонгогдох  эрхээ эдлэх гэж 11 жил явлаа. Харин 2020 онд миний энэ эрхийг сэргээлээ” гэж мэдэгдсэн.

Хэн нэгэн иргэн, эсвэл улстөрч байхаас үл хамаарч ард түмэнд мэдээлэл хийх эрхтэй. Гэхдээ хуульд заасан болон иргэн хүний хэм хэмжээний хүрээнд.

Нөгөөтээгүүр, шүүх бие даасан, хараат бусаар шийдвэрээ гаргах ёстой. Гэтэл шүүх хурал болохоос 48 цагийн өмнө МАХН-ынхан ийм мэдэгдэл хийсэн нь шүүхэд нөлөөлөх гэсэн үйлдэл гэж шууд утгаараа ойлгогдож буй юм.

Н.Энхбаяр сонгуульд нэр дэвших эрхтэй байж болно, түүнийг эрхийг хааж боосон байж болно. Гагцхүү үүнийг шүүхээс эцэслэн тогтоох ёстой. Тэр болтол Н.Энхбаяр битгий хэл, хэнбугай ч шүүхэд нөлөөлөх гэж, шүүхээс ийм шийдвэр гарах ёстой гэдэг байдлаар хандаж болохгүй. Тэр дундаа Монгол Улсын хувь заяаг удирдан чиглүүлж ирсэн Төрийн тэргүүний хувьд ч, ууган намын удирдагч, туршлагатай улстөрчийн хувьд энэ бол зохисгүй хийгээд ёс зүйгүй үйлдэл юм.

Тиймдээ ч Н.Энхбаяр тэргүүтэй МАХН-ынхан ямархуу ёс зүйтэй, хариуцлагатай улстөрчид болохоо энэ үйлдлээрээ батлан харууллаа.

Нэг ёсондоо МАХН-ын дарга Н.Энхбаяр шүүхэд нөлөөлөхөөр шоу хийлээ. Энэ шоунд иргэд итгэж, Н.Энхбаяр тэргүүтэн баярлав.

Г.Маргад