Монгол Улсын Шадар сайд, Улсын Онцгой комиссын дарга Ө.Энхтүвшин өнөөдөр цар тахлын үед хүнд нөхцөлд ажиллаж байгаа эмч, эмнэлгийн ажилчид болон албан хаагчдын төлөөлөлд орон сууцны батламжийг нь гардууллаа.

Тодруулбал, Засгийн газраас Төрийн үйлчилгээний болон төрийн тусгай албан хаагчдыг түрээслээд өмчлөх хэлбэрийн орон сууцаар хангах тухай тогтоолын төслийг баталсан. Энэ хүрээнд 1500 орчим албан хаагчийг орон сууцтай болох бөгөөд эхнээсээ орон сууцны батламжаа гардан аваад буй. Тэгвэл өнөөдөр мэргэжлийн хяналт болон онцгойгийн зарим албан хаагчдад орон сууцны батламжийг нь гардаж авлаа.

Энэ талаар Шадар сайд Ө.Энхтүвшин "Засгийн газрын хуралдаанаар түрээсийн хугацааг 15 жил болгосон. Урьдчилгаа төлбөр дээр уян хатан хандахаас гадна хүү нь жилийн зургаан хувиас илүүгүй байхаар ярилцаж байна. Эмч, эмнэлгийн ажилтан, онцгой, мэргэжлийн хяналтаас гадан хүнд нөхцөлд нэн эрсдэлтэй нөхцөлд ажиллаж байгаа төрийн албан хаагчдыг хамруулна. Тухайлбал, эрүүл мэнд, хилийн цэрэг, цагдаа, онцгой, мэргэжлийн хяналт, тагнуул, гаалиас гадна цэвэрлэх байгууламжид ажиллаж байгаа иргэдээс хамруулна. Санхүүжилт шийдэгдсэн" гэлээ.