Ард түмэн төрийн эрх барих эрхээ дөрвөн жилд ганцхан удаа л эдэлдэг. Бусад үед нь өөрсдийн сонгосон төлөөллөөрөө дамжуулан хэрэгжүүлдэг. Яг долоо хоногийн дараа УИХ-ын наймдахь удаагийн сонгуулийн санал авах өдөр тохионо. Харин нэр дэвшигчид өөрийгөө таниулах сурталчилгааны хугацаа дуусахад зургаахан хоног дутуу байна. Гэтэл УИХ-ын сонгуулийн 29 дүгээр тойрог, Хан-Уул дүүргийн нэр дэвшигчид ч, санал өгөх сонгогчдод ч ойлгомжгүй асуудал үүсээд удлаа.

Учир нь тус тойрогт МАН-аас нэр дэвшигч Г.Амартүвшинг өөр улсын иргэншилтэй байж магадгүй, давхар иргэншилтэй байж магадгүй гэсэн мэдээлэл нийгмийн сүлжээгээр гарч байна.

Хамгийн сүүлд өчигдөр гэхэд л нэр дэвшигч Г.Амартүвшинг Монгол Улсын иргэншлээс гарах өргөдлөө өгч байсан тухай мэдээлэл гарсан билээ. Түүнд дурдсанаар бол Ганибалын Амартүвшин нэр дэвшигч 2013 оны арваннэгдүгээр сарын 6-ны өдөр Монгол Улсын иргэншлээс гарах хүсэлтээ гаргаж байжээ.

Өөрийнх нь зурагтай, өөрийнх нь гарын үсэгтэй адилхан гарынэ үсэгтэй энэхүү өргөдөл үнэн бодит эсэхийг мэдэхгүй. Ямартай ч нэр дэвшигчээс энэ тухай асуухаар очсон сэтгүүлчидтэй уулзахгүй, тайлбар хэлэхгүй машиндаа суугаад зугатаад явж байгаа нь мөн л сошиал сүлжээгээр цацагдсан. Магадгүй сонгуулийн энэ их ажлын хажуугаар элдэв асуултад хариулахгүй гэхдээ ингэж авирласан ч байж мэднэ. Угаас сонгуулийн сурталчилгааны үеийн гарсан мэдээлэл бүхэнд хариулт өгнө гэвэл нэр дэвшигч өөрийн бодлого, мөрийн хөтөлбөрөө сонгогчдодоо таниулах хугацаагүй болох биз. Гэхдээ нэр дэвшигч Г.Амартүвшингийн хувьд асуудал арай өөр. Монгол Улсад хууль зөрчөөгүй хэн ч ажиллаж амьдрах эрхтэй. Харин төрийн эрх барих дээд байгууллагад зөвхөн Монгол Улсын иргэн л нэр дэвших, сонгогдох бас сонгох эрхийг эдэлдэг. Гэтэл энэ удаагийн сонгуулиар урьд өмнө нь хэзээ ч гарч ирж байгаагүй том асуудал дэгдэж байна.

Нэр дэвшигч Монгол Улсын иргэншлээс нэрээ хасуулж байсан уу? Нэр дэвшигч дахин Монгол Улсын иргэн болсон уу? Нэр дэвшигч хууль бусаар давхар иргэншилтэй юм биш биз гэсэн олон асуулт хариултгүй хэвээр байна. Нидерландын иргэний гадаад пасспортын зураг гарч ирлээ, Монгол Улсын хилээр орж гарсныг огноолсон гадаадын иргэн гэсэн дардастай баримт гарч ирлээ, эцэст нь Монголын иргэншлээс татгалзсан өргөдөл гарч ирлээ. Хамгийн гол нь энэ бүхэнд холбогдсон нэр дэвшигч Г.Амартүвшин үгүйсгэсэн бодит тайлбарыг итгэл төгсөөр хийж чадахгүй байгаа нь эргэлзээг улам лавшруулаад байна. Ингэхээр Хан-Уулын иргэдийн сонголтыг эргэлзээгүй болгохын тулд эрхэм Ерөнхийлөгч үгээ хэлэх хэрэгтэй байна. Учир нь, Монгол Улсын иргэншлээс гарах, иргэншил авах энэ бүх эрх мэдэл ганцхан Монгол Улсын төрийн тэргүүнд л хадгалагддаг. Өчигдөр мэдээллийн сайтуудаар явуулсан баримтуудаас харвал нэр дэвшигч Г.Амартүвшин 2013 онд Монгол Улсын иргэншлээс гарах өргөдлөө өгч байсан байж болзошгүй байна.

Энэ үед Монгол Улсын төрийн тэргүүнээр Ц.Элбэгдорж ажиллаж байлаа. Гэхдээ Монгол төрийн архив байж л байгаа. Эрхэм Ерөнхийлөгч Х.Баттулга энэ бүхэнд цэг тавин үгээ хэлэх цаг нь иржээ. Энэ хүн Монголын иргэншлээс татгалзаж байсан уу, татгалзсан бол зарлиг нь хэзээ гарч байсан бэ? Дахиж иргэншил хүссэн үү? Хүссэн бол хэзээ ёсоор болгож байсан бэ гээд энэ бүх асуултын хариултыг эрхэм Ерөнхийлөгч Та хэлэх цаг иржээ. Эс бөгөөс төр самуурахын эхлэл энэ болох гээд байна. Энэ сонгуулийн үр дүнгээр хоёр том нам адил хэмжээний суудал авлаа гэж бодъё. Бас нэр дэвшигч Г.Амартүвшин олонхийн саналаар сонгогдлоо гэж таамаглая. Яг энэ үед түүний энэ иргэншлийн асуудал дахин босч ирвэл яах вэ.

Сонгуулийн хугацаанд түүнийгээ сайтар далдлаж байгаад санал авчихвал яах вэ. Сонгогдсоных нь дараа хөдөлшгүй баримтууд ил гарч иргэншлийн асуудалтай хүнд итгэл хүлээлгэсэн болж таарвал яах вэ? Тэгвэл төрийн эрхийг, Засгийн газар байгуулах эрхийг аль нам нь авах вэ гээд асуудлууд ард ардаасаа ундрах гээд байгаа тул эрхэм Ерөнхийлөгч та энэ бүхэнд цэг тавих хэрэгтэй байна. Нэр дэвшигч Г.Амартүвшин Монгол Улсын иргэншлээс хэзээ нэгэн цагт татгалзаж байсан уу? Нэр дэвшигч Г.Амартүвшин Монгол Улсын иргэншлийг дахин сэргээсэн үү? Энэ хоёр асуултад эцсийн цэгийг эртхэн хатгая. Нэр дэвшигч Г.Амартүвшин гүтгүүлж буй эсэхэд цэг тавья. Нэр дэвшигч Г.Амартүвшинд нэр хүндийг нь эргүүлж өгье, Ерөнхийлөгч өө.