Сонгуулийн сурталчилгааны хоног дуусахад тав хоног үлдлээ. Тэд нэгэн зэрэг гараанаас эхэлж, өдгөө хугацааныхаа гуравны хоёрыг нь туулжээ. Тэдний хичээл зүтгэл ирэх лхагва гарагт иргэдийн өгсөн саналаас тодорхой болох юм.

УИХ-ын сонгуулийн тухай хуулийн дагуу сонгуульд оролцох нам, эвслийн мөрийн хөтөлбөр нь Монгол Улсын төсвийн тогтвортой байдлын тухай болон Монгол Улсын урт хугацааны хөгжлийн бодлогод нийцсэн байх ёстой. Тодруулбал, мөнгө, эд хөрөнгө амлах, үнэгүй болон хямдруулсан үнээр үйлчлэх, улс, орон нутгийн салбарын орлогыг бусдад хандивлах, уул уурхайн салбарын орлогыг хишиг, хувь болгож хуваарилах зэргийг хуулиар хориглодог. Бид өмнөх дугаартаа МАН, АН болон ШИНЭ эвсэл, Та бидний эвслээс дэвшүүлсэн мөрийн хөтөлбөрийн онцлох заалтаас танилцуулсан билээ. Энэ удаад бусад нам, эвслүүд эрүүл мэндийн чиглэлээр ямар зорилт дэвшүүлснийг тоймлон хүргэж байна.

Зөв хүн электорат “Хорт хавдраас шалтгаалсан нас баралтыг 10.5 хүртэл бууруулна”

• Эрүүл мэндийн салбарын бодлого, төсөв, санхүүжилт, үйл ажиллагаанд ил тод, нээлттэй байдлыг бий болгож, авлига, ашиг сонирхлын тогтолцоог устгана.
• Вакцин, эмийн хяналтын үндэсний лаборатори байгуулна.
• Эрүүл мэндийн ажилтны үнэлэмжийг дээшлүүлнэ.
• Төсвийн хуулийг эмнэлэг, эрүүл мэндийн байгууллага, хүн амд ээлтэй тусдамж үйлчилгээ үзүүлэх нөхцөл үүсгэхээр өөрчлөлт хийнэ.
• Эрүүл мэндийн салбарын санхүүжилтийн бүтцийг оновчтой болгох замаар эрүүл мэндийн даатгалын бие даасан байдлыг бэхжүүлж, иргэд эрүүл мэндийн үйлчилгээг оршин суугаа газрын харьяалал, өмчийн хэлбэр үл харгалзан эрүүл мэндийн даатгалаараа бүх шатлалын үйлчилгээг авах боломжийг нэмэгдүүлнэ.
• Эмч нарын мэдлэг, ур чадварыг дээшлүүлэх, салбарын шинэ технологи нэвтрүүлэх сонирхлыг нэмэгдүүлэх хөшүүргийг оновчтой нэвтрүүлж, уламжлалт анагаах ухааныг орчин үеийн шинжлэх ухаантай зөв хослуулна.
• Ерөнхий боловсролын сургуулийн сурагчдын эрүүл мэндийг хамгаалах, арүүл аж төрөх ёсыг хэвшүүлэхэд төрөөс онцгойлон анхаарах бодлого баримтална.
• Спорт цогцолбор, биеийн тамирын заал, талбай, цэцэрлэгт  хүрээлэг, дугуй болон дугуйн төрөлт тээврийн замыг 1000 хүн ам тутамд нэг байхаар зорилт тавьж, энэхүү зорилтод хүрэх арга хэмжээг хэрэгжүүлнэ.
• Эхийн эндэгдлийн түвшинг 100.000 амьд төрөлтөд 20 хүртэлх бууруулна.
• Хорт хавдраас шалтгаалсан нас баралтыг 10.5 хүртэл бууруулна.

Эх орончдын нэгдсэн нам ““Эрүүл монгол хүн” төслийг үргэлжүүлнэ”.

• “Эрүүл монгол хүн” төслийг үргэлжүүлэн хэрэгжүүлэхийг дэмжинэ.
• Эрүүл мэндийн даатгалд ардын уламжлалт болон нөхөн сэргээх эмчилгээг хамруулахыг дэмжинэ.
• Стандарт шаардлага хангасан эмнэлгүүдийг өмчийн хэлбэр үл харгалзан иргэд өөрсдөө сонгож, эрүүл мэндийн даатгалын ваучераар санхүүжүүлэх зарчмыг дэмжинэ.
• Эрүүл мэндийн салбарт хувийн хэвшлийн хөрөнгө оруулалтыг дэмжинэ.

Ард түмнээ хайрлая нам “Хүнээ хамгаалах, хүн амаа өсгөх, хүний хөгжлийг хангах, хүнээ халамжлах цогц бодлого хэрэгжүүлнэ”

• Хүн бүрийг эрүүл мэндийн чанартай, хүртээмжтэй, чирэгдэлгүй, төлбөрийн дарамтгүй, оношилгоо, эмчилгээ үйлчилгээнд хамруулах явдлыг эрүүл мэндийн салбарын нэн тэргүүний зорилт болгоно.
• Эмнэлгийн орчин үеийн тоног төхөөрөмж, техник хэрэгслээр бүх шатны эмнэлэг, эрүүл мэндийн төвүүдийг хангаж, зайн оношилгоог нэвтрүүлж, хүн бүрт эрүүл мэндийн үйлчилгээний дэвшилтэт ололтыг хямд хүртээж, эх орондоо найдвартай эмчлэгдэх нөхцөлийг бүрдүүлнэ.
• Хүн ардад ажил, амьдралын эрүүл, аюулгүй орчин бүрдүүлж агаар, хөрс, усны бохирдолтоос болж эрүүл мэндээр хохирогсдын хохирлыг буруутай этгээдээр нөхөн төлүүлэх чиглэл барина.
• Хүнээ хамгаалах, хүн амаа өсгөх, хүний хөгжлийг хангах, хүнээ халамжлахад чиглэсэн нийгмийн цогц бодлого явуулна.

Ард түмний нам “Эрүүл мэндийн хүний нөөцийн хангалт, ур чадвар нийгмийн хамгааллыг сайжруулна”

• Эрүүл дадал хэвшилтэй, идэвхтэй амьдралын хэв маягтай иргэн төлөвшүүлэн эрүүл мэндийн чанар, хүртээмж, үр дүнтэй тогтолцоог хөгжүүлнэ.
• Иргэн, гэр бүл, ажил олгогчийн оролцоонд тулгуурласан нийгмийн эрүүл мэндийн тусламж үйлчилгээний үнэдсний тогтолцоо бүрдүүлэх, өвчин, өвчлөлөөс нийтийг урьдчилан сэргийлэх, иргэдийн дундаж наслалтыг өсгөх хөтөлбөр хэрэгжүүлнэ.
• Нотолгоонд суурилсан орчин үеийн оношилгоо, эмчилгээний техник, технологийн дэвшлийг нэвтрүүлж, эрүүл мэндийн тусламж үйлчилгээний чанар, гүйцэтгэлд тулгуурласан санхүүжилт, даатгалын тогтолцоо бүрдүүлэх.
• Эрүүл мэндийн салбарт цахим үйлчилгээг өргөжүүлэн үндэсний эрүүл мэндийн мэдээллийн сан бүрдүүлэх.
• Эрүүл мэндийн хүний нөөцийн хангалт, ур чадвар нийгмийн хамгааллыг сайжруулах.
• Эмч сувилагчдын мэдлэг туршлагаа нэмэгдүүлэх, өөрийгөө тогтмол хөгжүүлж анагаах ухааны хөгжилтэй хөл зэрэгцэн алхах техникийн бололцоог хангах сургалт, хөтөлбөр, санхүүжилтийг шийдвэрлэнэ.

Б.Лхам