УИХ-ын 2020 оны ээлжит сонгуулийн нэр дэвшигчид өөрийн биеэ сурталчлах албан ёсны хугацаа дуусахад ердөө 24 цаг хүрэхгүй хугацаа үлдлээ.

Жил бүрийн сонгуулиар мөнгө тараалаа, сонгуулийг будлиантууллаа гэх асуудал их гардаг. Магад бэлэн мөнгөөр санал худалдан авах гэсэн ухуулагч тантай таарсан байж мэдэх. Сонгогчдод мөнгө тараах, санал татах зорилготой ямар нэг арга хэмжээ зохион байгуулахыг хуулиар хориглодог ч энэ удаад ч иргэдийн саналыг худалдан авах гэсэн оролдлого үргэлжилж байгааг цагдаагийн байгууллагаас нотлов. Тухайлбал, нэр дэвшигч тойрог дээрээ 300 мотоцикл хадгалж байсан, ухуулагчийнхаа автомашинд бензин хийх нэрийдлээр 80 орчим автомашины бензинийг дүүргэсэн зэрэг хэд хэдэн асуудал шалгагдаж, заримд нь хуулийн хариуцлага хүлээлгэсэн талаар онцолсон юм.

Үүнээс хамгийн анхаарал татах нэг зүйл нь нэр дэвшигч Б-ийн эхнэр төрсөн өдрөө тэмдэглэж байгаа нэрийдлээр өөр дүүрэгт очиж бэлэн мөнгө тараасан явдал.

Бүр нарийвчилбал, энэ сарын 15-нд Сонгинохайрхан дүүрэгт нэр дэвшигч Б-ийн эхнэр төрсөн өдрөө Баянгол дүүрэгт тэмдэглэжээ. Ингэхдээ иргэдэд бэлэн мөнгө тарааж байгаа баригдсан асуудал цагдаагийн байгууллагад бүртгэгдэж, хэрэг мөрдөн байцаалтын шатанд үргэлжилж байгаа юм байна.

Тэгвэл Сонгинохайрхан дүүргийн 27, 28 дугаар тойрогт “Б”-ээр эхэлсэн нэртэй нэр дэвшигчийг нэрлэе.

Тухайлбал, АН-аас Кёкүшюзан Д.Батбаяр, “Та бидний эвсэл”-ээс Э.Батшугар, Д.Бямбасүрэн нар нэр дэвшиж буй. Харин “Ард түмний олонхийн засаглал” намаас Д.Батбаатар нэр дэвшиж байгаа бол бие даагчаар Э.Болорчулуун бий.

Түүнчлэн “Зөв хүн Электорат эвсэл”-ээс С.Баярбаатар, Х.Базарханд, “ШИНЭ эвсэл”-ээс Д.Батбаяр, “Сахигтун! Үндсэн хуулийн 19” эвслээс Х.Бат-Ялалт, Б.Баяраа, “Ард түмний олонхийн засаглал” нам А.Батдорж нар байна.

Тэдгээрийн хөрөнгө орлогоос дурдвал Кёкүшюзан Д.Батбаяр жилийн 601 сая төгрөг, гэр бүлийн гишүүдийн нийт орлого нь 13.2 тэрбум төгрөг.

Харин Шинэ эвслээс нэр дэвшиж буй Донжоогийн Батбаяр жилийн 12.8 сая төгрөгийн орлоготой. “Та бидний эвсэл”-ээс Д.Бямбасүрэн жилийн 92.7 сая, гэр бүлийн гишүүдийн орлого 12.6 сая төгрөг, Э.Батшугар 93.8 сая, гэр бүлийн гишүүдийн нийт орлого 611 сая төгрөг. “Ард түмний олонхийн засаглал” намаас Д.Батбаатар жилийн 6.5 сая, гэр бүлийн гишүүдийн орлого 6 сая төгрөг, “Ард түмний олонхийн засагла”л намын А.Батдорж жилийн 6 сая, гэр бүлийн гишүүдийн нийт орлого 2 сая төгрөг, бие даагч Э.Болорчулуун жилийн 942 сая, гэр бүлийн гишүүдийн нийт орлого 455 сая төгрөг гэж тус тус мэдүүлжээ.

Эндээс харахад, бэлэн мөнгө тараах хэмжээний хөрөнгөтэй нэр дэвшигч Кёкүшюзан Д.Батбаяр, Э.Батшугар, бие даагч Э.Болорчулуун нар гэж харагдахаар.

Ташрамд дурдахад, Кёкүшюзан Д.Батбаярын гэргий дуучин Т.Баясгалангийн төрсөн өдөр цагдаагийн байгууллагын албан тушаалтны нэрлэсэн өдөртэй ойролцоо өдөр тохиодог юм байна.

Уг нь манай улсад иргэдийн саналыг эд бараа материал, мөнгөөр худалдан авах гэсэн нэр дэвшигчдийг торгоод өнгөрөөх биш нэр дэвших эрхийг нь хасдаг байвал магад дээрх асуудал гарахаас сэргийлэхэд үр дүнтэй. Иргэдийн санал өгөхөд ч нөлөөлөхгүй гэсэн үг.

Ямар ч гэсэн “Их хүссэн хүнд төрийн жолоог бүү атгуул” гэж үг бий. Хэрэв Сонгинохайрхан дүүргийн нэр дэвшигч Б-гээс мөнгө авсан, мөнгө өгч байгаатай таарсан сонгогч байвал анхааралдаа авна биз ээ.

Б.Лхам