УИХ-ын ээлжит сонгууль АН-ын хувьд ихээхэн найдвар тавьсан үе байв. Тэд олонх болж Засаг бүрдүүлнэ гээд бүр итгэл дүүрэн байсан гэхэд болно. Ерөнхий сайдад Р.Амаржаргалыг дэвшүүлсэн нь нэг талаар С.Эрдэнийн улс төрийн зөв нүүдэл байсан гэж үзэх хүн бий. Ямар ч гэсэн АН энэ сонгуулиар 40 орчим суудалд горилж байсан ч тэдэнд итгэл хүлээлгэсэнгүй. Бүр намын дарга С.Эрдэнэ Баянгол дүүрэгтээ өөрийн хүн болох С.Одонтуяадаа “хусагдав”.

Уг нь Баянгол дүүргийг АН-ын дүүрэг гэж ярьдаг юм. Ингэж нэрлэсэн нь ч учиртай. АН-ын дарга нарын ураг төрлийн хэлхээтнүүдээр дүүрсэн гэдэг юм. Тухайлбал, өмнөх сонгуулиар С.Эрдэнэ, С.Одонтуяа хоёр тус дүүргээс нэр дэвшиж С.Одонтуяа нь унасан ч дүүргийн Засаг даргаар дэмжүүлж чадсан. Өөрөөр хэлбэл, С.Эрдэнэ Баянгол дүүргийн АН-ын даргын хувиар С.Одонтуяаг Засаг даргаар нэр дэвшүүлж, сонгогдоход түүний нөлөө их байсныг цохон тэмдэглэх нь зүйтэй. Түүнчлэн АН энэ удаад ч мөн сөрөг хүчний үүргийг гүйцэтгэнэ. Өмнөхөө бодвол хоёр суудлаар илүүгээр гэсэн үг.

Өмнөх парламентаар тус нам есөн суудал авч бүлэг байгуулах эрхтэй болж байсан ч Ж.Батзандан, Л.Болд нар намаасаа гарснаар бүлэг задарч, зөвлөл болсон байдаг.

Энэ удаа намын дарга нь сонгогдож чадаагүйгээс гадна УИХ-д олонх болж чадаагүй учраас АН-ын дараагийн дарга хэн байх болон С.Эрдэнэ ямар албан тушаалд очих вэ гэсэн асуулт гарна. Тэгвэл АН-ын дараагийн дарга хэн бэ гэдгээс урьтаад С.Эрдэнэ ямар албан тушаалд очих талаар тэмдэглье. Түүнийг С.Одонтуяадаа “хусагдсан” гэж үзэх хүн байхад С.Одонтуяа Баянгол дүүргээс гурваар гарсан нь бараг л С.Эрдэнэ гарч ирсэнтэй ялгаагүй гэж харах хэсэг байгаа юм. Ямартай ч С.Эрдэнийн хаших дараагийн алба Баянгол дүүрэг. Ийнхүү АН хоёр сонгууль дараалж өвдөг шороодов.

Магадгүй нэрт нийтлэлч Б.Баабарын “Хамгийн зөв сонголт С.Эрдэнэ. АН эргэж сэргэхийн тулд эхлээд ёроолдоо тултал унах ёстой” гэж хэлсэн зөгнөл нь биелээд ч байх шиг. Тэгвэл АН ёроолдоо хүрэх ч хаа байсан юм.

Б.Лхам