МАН-ын Бага хурлаас Ерөнхий сайд У.Хүрэлсүхийг улираах шийдвэрийг 100 хувь гаргасан. Энэ дагуу УИХ-ын дарга Г.Занданшатар, МАН-ын Ерөнхий нарийн бичгийн дарга Д.Амарбаясгалан нар шинэ Ерөнхий сайдын нэрийг зөвшилцөхөөр Ерөнхийлөгч Х.Баттулгад бараалхсан юм. Хуульд зааснаар Ерөнхийлөгч Х.Баттулга Ерөнхий сайдад нэр дэвшүүлсэн У.Хүрэлсүхийг дэмжсэн тохиолдолд УИХ-ын чуулганаар оруулж батламжуулна.
МАН-ын Ерөнхий нарийн бичгийн дарга Д.Амарбаясгалан “Ерөнхий сайд Засгийн газартаа тодорхой хэмжээний бүтцийн өөрлөлт хийнэ. Тэр нь Үндсэн хуультай холбоотой асуудал. Үндсэн хуулиар эдийн засгийн асуудлыг чухалчилж үзэх нөхцөл бий болсон. Хоёрдугаарт, МАН мөрийн хөтөлбөртөө Соёлын яам байгуулна гэж онцгойлон тусгасан.
Хөгжлийн төлөвлөлт, эдийн засгийн тусдаа яам байх уу эсвэл зарим сайдын эрхлэх асуудлын хүрээнд авч явах уу гэдгээ одоо ярьж байна.
Нэг талдаа эдийн засгийн хөгжлийн яам гэж тусдаа яам байх ёстой гэж эдийн засагчид үздэг. Нөгөө талдаа Сангийн яамнаас салсан тохиолдолд яах вэ гэдэг олон зүйлээс хамаарч тусдаа яам байх нь зөв үү буруу юу гэдгийг бид хэлэлцэж байна. Шинээр Засгийн газар байгуулагдаж байгаа учраас төсөвт тодорхой зохицуулалтыг хийнэ” гэжээ.
Харин Ерөнхий сайд У.Хүрэлсүх “Үндсэн хуульд оруулсан нэмэлт, өөрчлөлтийн дагуу УИХ-аас дөрвөөс илүү сайд томилохгүй. Одоогийн сайд нараас 1-2 нь л улирна шүү.
Бусад нь УИХ-ын гишүүний ажлаа сайн хий. Хамтран ажилласан та бүхэндээ баярлалаа" хэмээн Бага хурлынхаа үеэр мэдэгдсэн байна. Ерөнхий сайд, МАН-ын дарга У.Хүрэлсүх болон Ерөнхий нарийн бичгийн дарга Д.Амарбаясгалан нарын хэлснээр шинээр эмхлэх Засгийн газарт одоогийн бүрэлдэхүүнд байгаа сайд нараас хамгийн ихдээ хоёр нь улирах бололтой. Харин Үндсэн хуулиар олгосон эрхийн дагуу сайдын алба буюу "давхар дээл" нөмхөр эрхтэй хоёр хүнийг парламентаас шинээр томилохоо Ерөнхий сайд илэрхийлсэн нь энэ.
Үүнээс үүдэж, У.Хүрэлсүхийн танхимд улирах хоёр сайд болон "давхар дээл"-тэй хоёр УИХ-ын гишүүн хэн байх вэ? гэсэн асуулт энэ өдрүүдэд хөврөх нь.
Хуулиараа Ерөнхийлөгч Засгийн газрын бүтцээ УИХ-д танилцуулж, батлуулсны дараа сайд нараа томилох эрх нь нээгдэх юм. Үндсэн хуулийн нэмэлт, өөрчлөлтөөр Ерөнхий сайдаас гадна Засгийн газрын дөрвөн сайд УИХ-ын гишүүнээр хавсарч ажиллах хязгаарлалттай. Нэг үгээр шинэ Засгийн газрын дийлэнх хувийг парламентын гаднаас томилох юм.
Г.Эрхэс
Сэтгэгдэл (16)