УИХ-ын Анхдугаар чуулганаар Засгийн газрын бүтэц, бүрэлдэхүүний тухай тогтоолын төслийг хэлэлцэж баталлаа. Тогтоолын төслийг Ерөнхий сайд У.Хүрэлсүх Ерөнхийлөгч Х.Баттулгатай зөвшилцсөний үндсэнд УИХ-д өргөн мэдүүлсэн юм. 

Хэлэлцүүлгийн үеэр УИХ-ын гишүүн, Засгийн газрын Хэрэг эрхлэх газрын дарга Л.Оюун-Эрдэнэ Оюу Толгойтой холбоотой С.Ганбаатар гишүүний асуусан асуултад "УИХ-аас Оюутолгойн төслийг сайжруулж Монгол Улсын эрх ашгийг хангуулах тогтоол өнгөрсөн жил гарсан. Энэ дагуу ажлын хэсэг байгуулагдаж, ахлагчаар миний бие ажиллаж байна. Бүтэц гэхээс илүү УУХҮЯ, БОАЖЯ, Сангийн яам, ТЕГ болон бусад зүйлтэй холбоотой ажлын хэсэг. Хуулийн байгууллагаас төлөөллөөс орсон. Дубайн гэрээнд эрх мэдлээ хэтрүүлсэн, Монгол Улсын эрх ашигт нийцээгүй нь тодорхой болсон. Эхнээсээ хууль хяналтын байгууллагаар шалгагдаж байгааг та бүхэн харж байгаа гэж бодож байна. Тухайн үед Ч.Сайханбилэг Засгийн газрын хуралдаанаар оруулахгүйгээр өөрөө захирамж байгуулж, Да.Ганболд, Б.Бямбасайхантай хамт Рио Тинтогийн тавьсан долоон асуултад буулт хийсэн.

Үүнд татвар, ноогдол гээд олон асуудалд Монголын төр буулт хийсэн хэлцэл болсон. Гэрээг шууд цуцлах гэхээр харамсалтай нь дэлхийн хэмжээний 23 том компани хөрөнгө оруулалт хийсэн. Маргаантай холбоотой асуудалд ажлын хэсэг ажиллаж байна.  Рио Тинтог Арбитрын шүүхэд өгсөн. Мөн бүх гэрээнд Европын холбооны томоохон байгууллагаар үнэлгээ хийлгүүлж байгаа, хугацаа орно. Ирэх дөрвөн жил Оюу Толгой төсөл Монголын эрх ашигт илүү нийцэж шийдэгдэх байх. Гэхдээ  олон улсын эрхзүй, Монгол Улсын хууль гэдэг амаргүй нөхцөл дунд оруулсан. Гадаад орчинд бид Ч.Сайханбилэгийн Засгийн газар гэхгүй нэг л цонхоор харж байгаа" гэсэн хариултыг өгсөн юм. 

Ийнхүү Засгийн газрын бүтэц, бүрэлдэхүүнийг баталснаар 31 дэх Ерөнхий сайдаар улиран сонгогдсон У.Хүрэлсүхийн Засгийн газар ерөнхий чиг үүргийн 6, чиглэлийн 8, нийт 14 яам, Шадар сайд, Засгийн газрын Хэрэг эрхлэх газрын дарга болон асуудал эрхэлсэн нийт 17 гишүүнтэй ажиллахаар болж байна.

С.Сүлд