31 дэх Ерөнхий сайд У.Хүрэлсүх танхимынхаа 16 сайдыг УИХ-д танилцуулж, тангараг өргүүлснээр Засгийн газраа албан ёсоор эмхэлж, үйл ажиллагаагаа эхлүүллээ. Үндсэн хуульд зааснаар түүний Засгийн газрын дөрвөн сайдыг УИХ-аас томилсон бол үлдсэн 12-ыг нь парламентын гаднаас буюу “дан дээл” гишүүдээр бүрдүүлж буйгаараа онцлог. Сайд нарыг УИХ-д танилцуулж, тангараг өргүүлсний дараа Төрийн тэргүүн Х.Баттулга хүлээн авч уулзаж, зарим захиасыг уламжилсан юм.
Энэ үеэрээ тэрбээр У.Хүрэлсүхийн танхимаас хоёр сайдыг онцолсон нь Сангийн сайд Ч.Хүрэлбаатар, Хууль зүй, дотоод хэргийн сайд Х.Нямбаатар. Ерөнхийлөгчийн тодотгосноор "Нэгдүгээрт, Сангийн сайд Ч.Хүрэлбаатар олон жил төр, засагт ажиллалаа. Ардын намын тавьсан өр, Ардчилсан намын тавьсан өр гэж дэлхий даяар мэдэхгүй. Монгол Улсын өр л гэж бий. Энэ их өрийг дарах уран ухаан, арга залийг та мэргэжлийн хүний хувьд бодож шийднэ биз" хэмээсэн.
Харин Хууль зүйн салбарын бодлогыг зангидахаар болсон Х.Нямбаатарт хандан "Хууль зүй, дотоод хэргийн сайд Х.Нямбаатар УИХ-ын Хууль зүйн байнгын хорооны дарга байсан. УИХ-д хоёр дахь удаагаа сонгогдлоо. Энэ салбарын сайдаар Ц.Нямдорж олон жил ажилласан.
Тэр хүний хэмжээнд хүрч ажиллахгүй бол салбарынхан чинь хүлээж авахгүй шүү гэдгийг өөрт чинь хэлье" гэсэн юм.
Ерөнхийлөгч Х.Баттулга дээрх хоёр сайдыг зориуд нэр цохиж, захиас хэлсэн нь учиртай. 2012 оноос эхлэн босгосон "Чингис", "Самурай" зэрэг бондын өр төлбөр болох 2.9 тэрбум ам.долларыг Монгол Улс ирэх онд төлөх хуваарьтай. Үүнийг төлж барагдуулах гарц гаргалгааг эрэлхийлэхээс эхлээд коронавирусийн цар тахлаас үүдэж агшсан эдийн засгийн хүндрэлийг даван туулах үүргийг Сангийн сайд Ч.Хүрэлбаатар хүлээж буй.
Цэвэр мэдлэг, туршлага, мэргэжлийн байдлаас асуудалд хандах, эдийн засгийн зөв шийдэл гаргах нь салбарын яам, Сангийн сайдаас хамаарна, хэрэг болно гэсэн үг.
Харин Үндсэн хуулийн хүрээнд хийж хэрэгжүүлэх томоохон хуулиудын нэмэлт, өөрчлөлтүүдээс эхлээд хууль эрх зүйн салбарт хийж дуусгаагүй орхисон шинэчлэлүүд шинэ сайд Х.Нямбаатарт ногдож байгаа юм. Х.Нямбаатар ч 2016-2020 оны парламентад хууль тогтоогчоор ажиллахдаа хэд хэдэн томоохон хуулийг гардаж боловсруулсан нь энэ удаад сайдаар ажиллах замыг нь зассан байж мэдэх. Нэг үгээр, У.Хүрэлсүхийн танхимаас Ч.Хүрэлбаатар, Х.Нямбаатар нар Ерөнхийлөгчөөс онцгой үүрэг авсан хоёр сайд болж байна. Цаг хугацаа нь ч тэднээс шаардах нь лав.
Г.Эрхэс
Сэтгэгдэл (10)