31 дэх Ерөнхий сайдаар улиран сонгогдсон МАН-ын дарга У.Хүрэлсүх намынхаа мөрийн хөтөлбөрт тусгасны дагуу Соёлын яамыг чиг үүрэг, бүтцийнх нь хувьд тусад нь байгуулж С.Чулууныг сайдаар нь томилсон. Энэ хүрээнд Засгийн газрын бүтцэд шинээр эмхлэн байгуулсан Соёлын яамны үйл ажиллагааг хэвийн явуулахын тулд төсөвт тодотгол хийх шаардлагатай Сангийн сайд Ч.Хүрэлбаатар онцолсон.

Өөрөөр хэлбэл, хуучин Боловсрол, соёл, шинжлэх ухаан, спортын яамын бүтцэд багтаж байсан уг салбарыг тусад нь салгаж, чиг үүргийнх нь хувьд дангаараа шийдвэр гаргаж, бодлого тодорхойлох эрхийг нь олгоод байгаа юм.

Үүнтэй холбоотойгоор БСШУС-ын Төрийн нарийн бичгийн даргаар ажиллаж байсан Б.Баярсайхан Өдрийн сонинд өгсөн ярилцлагадаа дурджээ. 

Тэрбээр "Манай улсад ёс суртахууны асуудал хөндөгдөх боллоо. Үүнийг бид бүх шатанд анхаарч, нийгмээ цэвэрлэх цаг болжээ. Сүүлийн 30 жилийн хөгжлийн түүхийг ард иргэд маань үнэлж, дүгнээд хэдийгээр салбар болгонд бид хөгжил ярьж ирсэн боловч, хүний хөгжлийн асуудлыг орхигдуулсан гэдэг дээр санал нэг байгаа. Алсын хараа 2050, Монгол Улсын урт хугацааны хөгжлийн бодлогын баримт бичигт хүний хөгжлийн бодлого тусгагдаж орж ирсэн.

Мөн МАН-ын мөрийн хөтөлбөрт хүний хөгжлийн бодлогыг суурь бодлогоо болгож оруулж ирсэн.

Би нийгэм, соёлын салбарт ажиллаж байсны хувьд эдгээрт ач холбогдол өгч, анхаарч ажиллана. Нийгмийн бодлого хүний хөгжлийнх болж өөрчлөгдсөн. Энэ маш зөв бодлого. Өнгөрсөн хугацаанд бид улс орны хөгжлийн талаар олон бодлого ярьж байсан ч хүний хөгжлийн асуудлаа орхигдуулсан байжээ. Хүний хөгжлийн бодлогыг суурь бодлого болгон оруулсан. Үүнд би гар бие оролцож ажиллана" гэсэн байна. 

Гишүүн Б.Баярсайханы хэлснээр түүний хувьд ирэх жилүүдэд Соёлын яамнаас авч хэрэгжүүлэх, арга хэмжээ, бодлого шийдвэр хууль тогтоогчийн хувиар хандаж ажиллах бололтой. 

Г.Эрхэс