Оросын Төрийн думд Буриадаас сонгогдсон депутат Михаил Слипенчук болон “Метрополь” ТӨХК-ийн Буриад дахь төлөөлөгч Баир Цыренов нарын хүрэл дүр Улаан Үдийн ажил хэргийн төвийн өмнө сүндэрлэх болжээ. Монгол моринд мордож, хуяг дуулга агссан буриад, орос хоёр эрийн хөшөө нь Цонжин болдог дахь “Түмэн хишигтэн” цогцолборын баатруудын нэг хэсэг ажээ.
   - Хоёр жилийн өмнө Дэлхийн монголчуудын чуулганы үеэр Монгол улсын ерөнхийлөгч Ц.Элбэгдорж хүрэлцэн ирж Байгаль нуурын ёроолд шумбасан анхны төрийн тэргүүн болсон юм. Тэрээр биднийг Улаанбаатарт урьж намайг “Алтан гадас” одонгоор, харин Баир Цыреновыг “Найрамдал” медалиар шагнасан юм гэж infpol.ru сайтын сурвалжлагчид Думын гишүүн Михаил Слипенчук ярьжээ.
   Энэ айлчлалынхаа үеэр тэд тухайн үеийн ЗТХБ-ын сайд  Д.Баттулгын хамт  Цонжин болдог дахь түүний эзэмшдэг “Түмэн хишигтэн” төслийн явцтай танилцжээ. Михаил Слипенчукийн хэлснээр Буриадын зочид нийт 13 баримал захиалсан байна. Хоёр нь мэдээж уригдсан зочдынх. Харин үлдсэн 11 нь найз нарынх нь хөшөөнд мөнхөрсөн дүр байлаа.
   24tsag.mn-ийн тодруулга: Михаил Слипенчук  бол Байгаль далайн гүн рүү шумбагч судалгааны “Миры” хөлгийг санхүүжүүлсэн “Метрополь” группыг үндэслэгч, эрдэмтэн, бизнесмен, нийгмийн зүтгэлтэн, улс төрч юм.