Ерөнхий сайд У.Хүрэлсүх дөнгөж сая /2020.8.7/ захирамж гаргаж, Хэнтий аймгийн Засаг даргаар Цагаанхүүгийн Идэрбатыг томиллоо.

Хэнтий аймгийн ИТХ гурав хоногийн өмнө хуралдаж, аймгийн Засаг даргаар ажиллаж байсан Н.Ганбямбыг өөр ажилд шилжих хүсэлт гаргасных нь дагуу чөлөөлсөн.

Ингэхдээ түүний оронд Хэрлэн сумын Засаг дарга бөгөөд Чингис хотын захирагч Ц.Идэрбатыг томилуулахаар шийдэж Ерөнхий сайдад уламжлахаар тогтжээ. Ц.Идэрбат нь багш, төрийн удирдлагын менежер мэргэжилтэй.

Хэрлэн сумын Засаг даргын орлогчоор 2008-2012 онд ажиллаж байсан. Хэнтий аймгийн МАН-ын хорооны дэд дарга, аймгийн ИТХ-д гурав дахь удаагаа төлөөлөгчөөр сонгогдсон нэгэн юм.

Түүнийг 2016 оны 11 дүгээр сарын 8-ны өдрийн ИТХ-ын шийдвэрээр Хэрлэн сумын Засаг дарга бөгөөд Чингис хотын захирагчаар сонгон томилж байжээ.

Харин Хэнтий аймгийн Засаг дарга асан Н.Ганбямба нь 1979 оноос хойш Өндөрхаан хотын 10 жилийн Нэгдүгээр сургуульд багш, Бор-Өндөр сумын 10 жилийн сургуульд хичээлийн эрхлэгч, Хэнтий аймгийн МАХН-ын хороонд тасгийн эрхлэгч, нарийн бичгийн дарга, АИХ-ын депутат, УБХ-ын гишүүн, УИХ дахь МАХН-ын бүлгийн ажлын албанд ахлах зөвлөх, ХХАА-н дэд сайд, Монголын Хэрэглэгчдийн эрх ашгийг хамгаалах холбооны ерөнхийлөгч, Хэнтий аймгийн МАН-ын хорооны дарга, УИХ-ын гишүүнээр гурван удаа сонгогдон ажиллаж иржээ.

2016 оны УИХ, Орон нутгийн сонгуульд Хэнтий аймгийн МАН-ын даргын албан тушаалтай орж байсан түүнийг сонгуулийн дараа аймгийн Засаг даргаар томилсон.

Харин сонгуульт хугацаагаа дуусгалгүй албан тушаалаасаа буусан тухайд хэд хэдэн тайлбар явж байна. ИТХ-ын албан ёсны тайлбараар Н.Ганбямба өөр ажилд шилжих болсон учраас чөлөөлөгдсөн гэсэн.

Өөр эх сурвалжийн мэдээллээр Н.Ганбямба хүүгээ Монголбанкны Тэргүүн дэд ерөнхийлөгчөөр томилуулсныхаа хариуд ийн ажлаа өгч байгаа гэж байна. Өөрөө ч хоосон хоцрохгүй бололтой. Дипломат чиглэлийн албан тушаалд очихоор яригдаж байгаа аж.

Юутай ч хоёр сарын дараа болох гэж буй Орон нутгийн сонгуулийн өмнө Хэнтий аймаг удирдлагадаа өөрчлөлт орууллаа. Ингэхдээ “тавиад оныхон” гэгддэг үед харьяалагддаг Н.Ганбямба даргыгаа явуулж оронд нь “наяад он”-ы залууг аймгийн Засаг даргаараа томилууллаа. Өөрөөр хэлбэл, Н.Ганбямба ёс зүй гаргаж, залуу үедээ зай тавьж өглөө гэж үзэх хэсэг бас байна.

Мэдээж, энэ нь Орон нутгийн сонгуулийн өмнөх МАН-ынхны тактик биз. Гэвч Монголын улс төрд тодорхой хэмжээнд үе солигдож байгаагийн нэг илрэл нь энэ юм. Сар гаруйхны өмнө болж өнгөрсөн УИХ-ын сонгуульд залуус олноороо ялалт байгуулж, Монголын улс төрд олон жил ноён сууж ирсэн МАН, АН-ын улстөрчид сонгогдолгүй хоцорсон.

Нөгөөтэйгүүр МАН-ын хувьд сонгуульд амжилт гаргаагүй ахмадуудаа ерөнхийдөө “чөлөөнд” нь гаргаж байна. Энэ намын удирдлагын бүтэц, тэндээс төрд очиж байгаа боловсон хүчний нас, боловсролын байдал харьцангуй өөрчлөгдсөн.

Харин АН хэрхэх нь тодорхойгүй бужигнасаар л байна.

Хэнтий аймагт гэхэд л аймгийн Засаг дарга байсан Ж.Оюунбаатар Орон нутгийн сонгуульд дахиж оролцоод Засаг дарга болно гэсэн яриа хөөрөөтэй явж байгаа аж. Тэрээр УИХ-д гурван удаа нэр дэвшээд “ойчсон” байдаг. Гэсэн ч “Дахиад өрсөлдөж, давбал дарга болно” гэх яриа тохироог намын төвшиндөө хийжээ.

Тэгвэл сая УИХ-ын сонгуульд анх удаа өрсөлдөж, Ж.Оюунбаатараас дутахгүй санал авч, нэгэнт танигдсан Т.Пүрэвхатан гэх бүсгүй бий. Тэр зүтгэвэл АН-д бас боломж харагдаад байгаа юм.

Гэсэн ч Ж.Оюунбаатар нь “Би Засаг дарга болох ёстой” гээд зүтгэчихвэл юу болж дуусахыг тэнгэр л мэдэх биз.

Хэнтийд өрсөлдөх гол хоёр намын “сонгуулийн бэлтгэл” нэг иймэрхүү байна.