Монгол Ардын намын 31 дүгээр Их хурал 3 өдөр гаруй хуралдаж өнөө өглөө 06:50 цагт өндөрлөжээ. Энэ удаагийн их хурлын хамгийн том шийдвэр бол намын шинэ даргаар Н.Учралыг сонгосон явдал юм. Дүрэмдээ өөрчлөлт оруулах асуудалд Их хурлын төлөөлөгчид чамгүй хугацааг зарцууллаа. Ингэснээр намынхаа үндсэн дүрэмд 44 заалт шинээр нэмж оруулж, 57 заалтыг өөрчлөн найруулж, 9 заалтыг хасжээ.

Үүнээс гадна Ерөнхий сайд Г.Занданшатарын тэргүүлсэн Засгийн газрыг тогтвортой ажиллуулахаар шийдвэрлэсэн байна. Үүнийг ч нотолж, намын шинэ дарга Н.Учрал Засгийн газрыг тогтвортой ажиллуулна гэдгээ Их хурлын индэр дээрээс хоёргүй утгаар илэрхийлсэн.

Их хурлын сүүлийн өдөр  Бага хурлын гишүүд болон Хяналтын ерөнхий хорооны гишүүдийг шинээр сонгосон байна. Бага хурлын бүрэлдэхүүнийг шинэчлэхдээ тоог нь нэмэгдүүлж, ингэхдээ эмэгтэй гишүүдийн квотыг 40 хувьд хүргэжээ. Шинээр эмхлэн байгуулагдсан Бага хурал өнөөдөр 16:00 цагт хуралдах товтой байна.