ЖДҮХС-г цөлмөсөн, албан тушаал, эрх мэдлээ ашиглан хямд хүүтэй зээл гаргуулан авсан хүмүүс эхнээсээ ял сонсоод эхэллээ. Ял сонсоод эхэллээ гэдэг нь Улсын ерөнхий прокурор асан М.Энх-Амгалангийн өмнөх парламентад бүрэн эрхийг нь түдгэлзүүлэхээр оруулж ирсэн нэр бүхий дөрвөн гишүүн юм.

Тэднийг ЖДҮХС-аас авсан зээлээ банк бус санхүүгийн байгууллагаараа дамжуулан мөнгө угаасан байж болзошгүй хэрэгт холбогдуулан шалгаж, одоо ял аваагүй хэрэг нь прокурорын байгууллагад хянагдаж байгаа нэг л гишүүн асан байна. Тэр нь Л.Энхболд. Тэрбээр өөрийн хамаарал бүхий компаниар дамжуулан сангаас 950 сая төгрөг зээл авсан баримт дэлгэгдсэн. Түүний хөрөнгө оруулгын мэдүүлэгтээ дурдсанаар “Ирээдүй инвест” ББСБ-ын 50 хувийг эзэмшдэг. Гишүүн болохоосоо өмнө банк бусынхаа захирлаар ажиллаж байсан гэдэг.

Улмаар уг хэрэгтэй холбогдуулан прокурорын байгууллагаас түүний бүрэн эрхийг цуцлах үндэслэлд “УИХ-ын гишүүн Л.Энхболд нь өөрийн бусдад төлөх өрийг барагдуулах зорилгоор Х тайлантай байсан автомашинаар ачаа тээвэрлэх үйл ажиллагаа явуулах чиглэлээр үүсгэн байгуулсан иргэн О-ийн компанийг иргэн Ч-ийн нэр дээр бэлэглэлийн гэрээгээр шилжүүлэн авч, мах боловсруулах “Дэлгэр говь” төсөл бичүүлэн, 2018 оны дөрөвдүгээр сарын 20-ны өдөр 4380 дугаартай төслийг дэмжихийг хүссэн бичгийг УИХ-ын гишүүн, ХХААХҮ-ийн сайд Б.Батзоригт хүргүүлснийг шийдвэрлэж, 950 сая төгрөгийн зээлийг ЖДҮХС-аас гаргаж өгсөн байна” хэмээн танилцуулсан байдаг.

Гэвч ЖДҮХС-ийн асуудал өөр рүү нь чиглэхтэй зэрэгцэн Л.Энхболд Тавантолгойн орд газраас 340 мянган тонн нүүрс хулгайд алдагдсан гэх шуугианыг дэгдээж учгийг өөр тийш чиглүүлэхийг оролдсон ч “даравч далдайна, булавч бултайна” гэгчийн үлгэрээр бүрэн эрх нь ч дуусаж үнэнд гүйцэгдэж байна. Түүнтэй хамт шалгагдаж байсан журмын нөхөд нь эхнээсээ ял аваад эхэлсэн. Өнөөдөр гишүүн асан Д.Дамба-Очирт холбогдох хэргийг шүүх бөгөөд хариуцлага хүлээх нь тодорхой болж буй. Одоо Л.Энхболд л үлдлээ.

Харин ЖДҮХС-аас өөрийн хамаарал бүхий этгээдээрээ дамжуулан зээл авсан МАН-ын бусад нөхдийн асуудал үүгээр дарагдаад өнгөрөх үү.  

Б.Лхам