УИХ-ын ээлжит бус чуулганаар 2020 оны Төсвийн тодотголыг хэлэлцэж байна. Энэ үеэр УИХ-ын гишүүнээр хоёр дахиа сонгогдоод буй С.Ганбаатар өөрийнх нь сонгуулийн туг болсон сэдэв болох Оюу Толгой тойрсон асуудлыг хөндсөн юм. Тэрбээр "Төсвийн алдагдал 4,8 их наяд гэж байна. Уул уурхайн баялаг 25 хувиар унасан байхад Оюутолгойнх зүгээр явсан. Өнгөрсөн хугацаанд 71 тонн алт, 250 тонн алттай тэнцэх баялаг Оюу Толгойгоос гарсан. Далд уурхай ашиглалтад орохоор бүр ч их нэмэгдэнэ. Оюу Толгойг шалгах ажлын хэсгийг өнгөрсөн парламентын үед байгуулж, эрх зүйн орчныг бүрдүүлсэн. Оюу Толгойтой асуудал ярьсан уу.

Модоо барьж байгаа хэцүү цаг үед боловсрол, эрүүл мэндийн салбараасаа л танахгүй шиг төсвөө тодотгочих юмсан" гэсэн үгийг дайв.

Хариуд нь Сангийн сайд Ч.Хүрэлбаатар "Монгол хоёр том гүрний дунд байдаг учраас том сэтгэж, зөв бодлого хэрэгжүүлж амьдармаар байна. Үгийн өөн дээр дөрөөлж гүтгэнэ, дайрна. Ийм зүйл ядаж энэ парламентын танхимд баймааргүй байна. Боловсрол, эрүүл мэндийн салбарын төсвөөс танахгүй. Оюу Толгойтой холбоотой ажлын хэсэг ажиллаж байгаа" гэсэн бол ЗГХЭГ-ын дарга Л.Оюун-Эрдэнэ "Оюу Толгой төсөлд Монголын эрх ашгийг хамгаалах тогтоол гарсны дагуу Засгийн газар дээр ажлын хэсэг ажиллаж байгаа.

Татвартай холбоотой асуудлаар бид Арбитрын шүүхэд хандсан. Өнгөрсөн долоо хоногт Оюу Толгойн холбогдох удирдлагатай уулзалт хийсэн. Дубайн буюу далд уурхайн гэрээнд таван заалт бүхий өөрчлөлт оруулах саналыг Монгол Улсын Засгийн газар тавьсан.

Зөвхөн Рио Тинто биш бусад жижиг хувьцаа эзэмшигчидтэй уулзалт, яриа хэлэлцээр хийж байгаа.

Бид олон улсын гэрээний хүрээнд үнэлгээ хийгдээгүй нь өнөөдрийн энэ олон маргаанууд үүсэх шалтгаан болсон гэж үзэж байгаа. Оюу Толгойн гэрээ хийх сэдэл буруу байгаагүй, харин гэрээний зарим зүйл заалтууд дээр анхаарах зүйл байгаа гэдгийг хөрөнгө оруулагчдад хэлж байгаа" гэсэн тайлбарыг өглөө.

С.Сүлд