УИХ-ын үдээс хойшхи чуулган Төсвийн тодотголоор үргэлжилж байна.

Д.Ганбат: Төсвийн тодотгол үнэхээр оройтож байна. Өмнө хийчих байсан. Өдий хүртэл явуулаад улс орныг элгээр нь хэвтүүлчихлээ. Хүнд байдалд орчихлоо. Энэ дээр анхаарах ёстой. Оруулж ирсэн төсвөөр арай ч дээ Засгийн газар гэж хэлмээр байна. Болж байна бүтэж байна гэх зүйл ганц хоёр л байна. Ипотекийн зээлийг ядаж 5 хувьд хүргэчих л дээ.

Бид хүүхдийн мөнгийг өсгөсөн, ковидыг ингэсэн гээд л цөөхөн юм ярих юм. Тэр ногдол ашигаа өгөөч. Хэчнээн гуйлгах гэсэн юм. Хэрэгтэй, хэрэггүй төрийн өмчит компаниудаа хувьчлаач. Төсвийн тодотголыг аль эрт хийчихсэн бол андлалын хөшөө зэрэг янз бүрийн хэрэггүй юм баригдахгүй л байлаа. Цар тахлын үед хамгийн түрүүнд иргэд байх ёстой. Иргэд рүү харж ажилла. Дундаж давхарга, аж ахуйн нэгжээ дэмж, Тэгэхгүй бол эдийн засаг улам доройтох нь.

Ч.Хүрэлбаатар: Д.Ганбат гишүүн ээ зарим зүйл дээр санал нийлэхгүй байна. Төсөв тодотгохгүй байсаар байгаад эдийн засгийг элгээр нь хэвтүүлчихлээ гэх юм. Төсөв тодотгоод эдийн засаг сэргэчихдэг бол хоёр сар бүр тодотгоод байя. Иргэдээ хамгаалах, аж ахуйн нэгжүүдээ дэмжих ажлыг цаг тухайд нь авч ажиллаж байсан.

1072 ширхэг хувьцааг компани бүгдийг нь төвлөрүүл гэдэг шаардлага тавьж байгаа. 60 тэрбум төгрөг төвлөрүүлсэн байсан. Хэвлэлийн хурал хийсний дараа 40 тэрбум төгрөг шилжүүлсэн байна лээ. Удахгүй төвлөрүүл гэж шаардлага тавьж байгаа.

Б.Лхам