УИХ-ын ээлжит бус чуулганаар төсвийн тодотгол хийх асуудлыг хэлэлцэж байна. Энэ үеэр УИХ-ын гишүүн С.Чинзориг их, дээд сургуулиудын төлбөрийг нэмэхгүй байх саналыг орууллаа. Тэрбээр "УИХ-ын ээлжит сонгуулийн өмнө төрийн мэдлийн их, дээд сургуулийн сургалтын төлбөрийг нэмэгдүүлэхгүй байх, төлбөр төлөх нөхцөлийг уян хатан байх асуудлыг ярьсан. Гэтэл зарим сургуулийн сургалтыни төлбөр нэмэгдэх гэж байгаа тухай яригдах боллоо. Бүр сургалтын төлбөрөө 100 хувь төлсөн тохиолдолд хичээлд нь суулгана гэсэн гэж байна. Цар тахал нүүрлэж, эдийн засаг хямралтай байна. Тиймээс төлбөр төлөх нөхцөл уян хатан байх тал дээр салбар яамнаас ямар бодлого баримтлах вэ" гэдгийг тодруулж  асуусан юм.

Уг асуултад БСШУС-ын сайд Л.Цэвэдсүрэн "2020-2021 оны хичээлийн жилийн сургалтын төлбөрийг нэмэхгүй байх чиглэл өгсөн. Энэ дагуу 2-4 дүгээр курсийн оюутны сургалтын төлбөр огт нэмэгдэээгүй. Харин зарим нэгдүгээр курсийн онцлого мэргэжлийн кредитийн төлбөр бага зэрэг нэмэгдсэн. Төлбөр төлөх нөхцөлийг уян хатан байхыг даалгасан. Дээр нь Боловсроллын зээлийн сангаас гурван хүүхэд зэрэг суралцаж байгаа тохиолдолд тодорхой хэмжээний тэтгэлэг олгодог. Энэ процесс хэвийн үргэлжилнэ" гэлээ.