УИХ-ын Хууль зүйн байнгын хорооны хуралдаанаар улсын төсвийн тодотгол болон бусад асуудлыг хэлэлцэж байна.

Энэ үеэр УИХ-ын гишүүн Н.Алтанхуяг: "УИХ-ын хууль тогтоох эрх Засгийн газарт төвлөрсөн юм байна. Өнгөрсөн парламент юу ч хийсэн юм, бүү мэд. Нэгэнт гарсан алдаа юм гэж бодъё. Цар тахлын үед ард иргэдийн амжиргааг дэмжсэн, ААН-ийн үйл ажиллагааг доголдуулахгүй байхад анхаарах ёстой.

Гэтэл маш их мөнгөөр хөрөнгө оруулалт хийсэн байна. Энэ бол маш том алдаатай бодлого.

Зарим хүн хүний үг сонсохгүй юм. Уг нь өмнө нь эхлүүлсэн 500 обьектоо гүйцээх ёстой байтал нэмээд 900 обьект нэмсэн. Цар тахлын үед 1400 обьектыг дуусгаж чадах уу. Баахан элс, цементийн овоолготой гарз болох вий. Дэндүү хариуцлагагүй. Танах зүйл байвал танамаар байна. Цар тахал гэчихээд төрийн байгууллагын баахан барилгын суурь тавидаг, тавилга худалдан авдаг. Ингэмээргүй байна. Төсвийн зарлагаа хэмнэмээр байна. ЖДҮ-гийн төсвөөсөө ард түмэндээ юм өг л дөө. Төлөвлөгөөгөөр 517 тэрбум тавьсан хэрнээ гүйтгэлээрээ 534 тэрбум гэж тавьчихсан байх юм. Монгол Улс нэг л тоотой байх ёстой. Он дуусах гэж байхад энийг нь ч, тэрийг нь ч хасмаар байна гэж хэлэх хэцүү юм.

Гэхдээ юмаа цэгцэл. Засгийн газарт асар их эрх мэдэл очсон шүү. Сонгууль болдогоороо болно. Хэдэн хүн солигдоно. Харин Монгол Улс байдгаараа байна шүү” гэлээ.