Ерөнхий сайд У.Хүрэлсүх Газрын тос боловсруулах үйлдвэрийн албан оффисст ажиллаж байна. Энэ үеэр тэрбээр “Алтан гартай, бурхан ухаантай инженер техникийн ажилчид бүрдсэн байна. Газрын тосны үйлдвэр бол монголчуудын хүсэл мөрөөдөл. Үүнийг хэрэгжүүлэх гэж нойр хоолоо хугаслан хүчин зүтгэж байна. Ерөнхий сайдын хувьд улс орноо эрчим хүчээр хангах ёстой. Хоёрдугаарт, дотооддоо газрын тосоор хангах ёстой. Гуравдугаарт хүнсээ өөрсдөө хангаж, экспортлогч болох учиртай. Газар тариалан, мал аж ахуй нь байна. Гангийн болон цементийн үйлдвэртэй болох хэрэгтэй. Эдгээрийг шийдсэн байхад Монгол Улс хөл дээрээ босно. Жилдээ 1.2 тэрбумыг шатахуун импортлоход зарцуулж байна. Үүнийг дотооддоо шингээнэ. Ам.долларын ханш буурна. Аюулгүй байдлаа хангана. Дэлхийн зах зээлийн ханшид зохиулахгүй.

Үе үеийн Засгийн газрын толгойны өвчин болж ирсэн асуудал. Энэхүү чухал ажлыг хийж байгаа хүмүүс нь та бүхэн. Шинэ сайд томилогдсон. Г.Ёндон сайдын хувьд инженер хүн. Түрүүн өөрт нь хэлсэн. Таны нэг номерын ажил нь Газрын тосны үйлдвэр шүү гэж. Ерөнхий сайдын анхаарлын төвд энэ үйлдвэр байгаа. Б.Энх-Амгалан дарга Засгийн газрын зүгээс дэмжлэг үзүүлэх тал дээр анхаарах байх. Бүх шатандаа энэ үйлдвэрийг дэмжих ёстой" гэлээ.

С.Сүлд