УИХ-ын чуулганы ээлжит бус чуулганы нэгдсэн хуралдаанаар өнгөрсөн тавдугаар сарын 7-ны өдөр батлагдсан УИХ-ын тухай хуулийн шинэчилсэн найруулгад тавьсан Ерөнхийлөгчийн хоригийг хэлэлцэж байна. Энэ үеэр гишүүд үг хэлж, асуулт асуулаа.

Н.Алтанхуяг: С.Бямбацогт гишүүн ээ, та яагаад байнгын хороон дээр хэлсэн миний саналыг хасаад хаячихав. Би УИХ-ын гишүүн биш юм уу. Ингэж болохгүй. Залруулга хий. Монгол Улсын сонгосон сонголт, ардчилалд аюул учирч байна. Хэдэн нөхдүүд сонгогдоод яагаад хүний хууль санаачлах эрхэнд халддаг юм. Үндсэн хууль өөрөө зөрчилтэй байна. Бүх ард түмнээс сонгогддог Ерөнхийлөгчийн хууль санаачлах эрхийг хааж болохгүй. УИХ-ын тухай хуулиар Ерөнхийлөгчийн хууль санаачлах эрхийг хязгаарлана гэж юу байсан юм. Би Л.Мөнхбаатар гишүүнтэй санал нэг байна. Дээр нь Их хурлын гишүүний хууль санаачлах эрх хүртэл байхгүй болсон.

С.Бямбацогт дарга та юу яриад байгаа юм бэ. Ерөнхийлөгч өөрөө ярьсан гэх юм. Ерөнхийлөгч сүүлдээ буруутан болж байна. Арай хэтэрч байна. Үндсэн хуулийнхаа суурь зарчим дээр ажлаа хийе. Яагаад хүний хууль санаачлах унаган эрх рүү халддаг юм бэ. Яагаад С.Бямбацогт гишүүн бүгдийг тайлбарлаад байдаг юм. Би зарчмын асуудал ярьж байна шүү. УИХ-ын гишүүн, Ерөнхийлөгчийн хууль санаачлах эрхэнд халдаж болохгүй.

С.Бямбацогт: Хууль зүйн байнгын хороон даргын хувьд байнгын хороогоор Ерөнхийлөгчийн хоригийг хэлэлцсэн. Би хэт мэддэг мэргэн жараахай шиг яриагүй. Хуулиар олгогдсон журмын дагуу хариулсан. Байнгын хорооны санал дүгнэлтэд таны саналыг тусгаагүйд хүлцэл өчье. Цаашид анхаарч ажиллая.

Хууль санаачлах эрхийг хаагаад байна гэж байна. 68 хувийн татвар гээд гэнэт нэг гишүүн санаачлаад маргааш нь баталчихсан юу боллоо. Цалинг 1.5 саяд хүргэнэ гээд л ярьсан. Дэмжээгүй нь адлагдаж, дэмжсэн нь баатар болдог. Эдийн засаг давж гарч чадах уу. Ингээд ярьж байгаад Ерөнхийлөгчийн хууль санаачлах хүрээ хязгаарыг тогтоох нь зөв юм байна гэж оруулж ирсэн нь хэтрүүлсэн асуудал болжээ. Бусдаар хоёр хүн хоорондоо ярьсныг ингэж яриад байгаа юм биш.

Б.Лхам