УИХ-ын өнөөдрийн чуулганаар Ерөнхийлөгчийн хоригийг хүлээж авах эсэхийг хэлэлцлээ. Энэ үеэр УИХ-ын гишүүд санал хэлсэн юм.

С.Ганбаатар:  Миний эрхэнд халдлаа гэж нэг ч гишүүн яриагүй байх. Бидний гуйж гувшиж авсан эрхэнд МАН халдчихлаа. Ерөнхийлөгчийн булааж авсан эрхийг өнөөдөр буцааж авч байна. Ер нь бол Ерөнхийлөгчийн эрхийг бус ард түмний эрхийг буцааж авч байгаа хэрэг шүү. Товчхон хэлбэл, жолоочдоо бид бүх эрхээ өгчихөж. Оюутолгойн гэрээг ярьж байна. Хэн санаачилж, оруулж ирсэн билээ. Тухайн үеийн сайдууд гаднын гар хөл болсон. Дубайн гэрээ Засгийн газар дээр яригдсан биз дээ. Гишүүдийг хариуцлагатай байлгана гэж ярих юм. Энэ эрх ард түмэнд бий шүү.

Д.Ганбат: Ерөнхийлөгчийн хоригийг 100 хувь хүлээж авч байх шиг байна. Гишүүний өөдөөс тайлбар хийдэг хурган дарга нар болиорой. Ж.Батсуурь гишүүн оновчтой харж хэллээ. Бид ч гэсэн ард түмэн. Гэтэл сүүлийн 4-5 жилийн хугацаанд УИХ-ын гишүүд ард түмнээсээ хулгай хийдэг болсон. Үүнээсээ болж хуулийнхны гарт ордог. Эрх мэдлийг хуваах зарчим бий. Үүнийг тодорхой болгох зам нь парламент. Гэвч үүнийгээ гүйцэт хийж чадаагүй. Нөгөө талаараа хурган дарга нар, хурган дарамтлагч нарт хандаж хэлэхэд хэлсэн үгэндээ хариуцлагатай байгаарай. Эгүүлэн татах шалтаг чинь болох вий. Сайн бодоорой. Нэгнээ буудсан явдал гарсан байх аа. Энэ дөрвөн жилд ийм зүйлд хүргэв ээ. Сүүлд нь ард түмэн хохирдог шүү.

УИХ-ын дарга Г.Занданшатар:  УИХ-ын олонх, цөөнх болж үг хэлэх нь парламентийн зарчим. Гэхдээ нэгнээ хүндэтгэх ёстой шүү.

Ийнхүү гишүүд үг хэлж дууссан юм. Үүний дараа Ерөнхийлөгчийн хоригийг хүлээж авах эсэхэд санал хураалт явуулахад нийт 77 хувь нь дэмжсэнээр тогтоолын төсөл батлагдлаа.

Г.Маргад