УИХ-ын чуулганы нэгдсэн хуралдаанаар Төсвийн тодотголыг хэлэлцэв. Сангийн яамнаас өргөн мэдүүлсэн хуулийн төсөлтэй холбогдуулж, сайд Ч.Хүрэлбаатараас гишүүд асуулт асууж, хариулт авсан юм.

Энэ үеэр Сангийн сайд Ч.Хүрэлбаатар “Төсвийн тодотголоор төрийн байгууллагуудын 118 тэрбум, хөрөнгө оруулалт дээр 520 орчим тэрбум төгрөгийг хасч оруулж ирсэн.

Иргэдийнхээ орлогыг хамгаалах, эрүүл мэндэд анхаарах зэрэг арга хэмжээтэй холбоотой урсгал зардлууд бол нэмэгдсэн. Ер нь бол зардлыг бууруулж чадахгүй гэхэд нэммээргүй байна. Гишүүд ч гэсэн ийм зардал нэммээр байна л гэсэн санал гаргаж байгаагаас хасна гэсэн санал лав гарахгүй байна” гэдгийг тодотгосон.

Харин УИХ-ын гишүүн Б.Энхбаяр “Төрийн албаны данхар бүтэц, авлига, хүнд суртлын асуудлыг маш их ярьж байна. Төрийн өмчит 500 орчим компани бий. Тэндээс хоёр том үйлдвэр нь ашигтай ажиллаж байгаа гэсэн мэдээлэл өгсөн.

Маш их зардал гаргадаг. Төрийн өмчит нэг компани 40 сая төгрөгөөр өнгөрсөн онд шинэ жил хийсэн байна лээ.

Төрийн алба данхайгаагүй, томроогүй гэдгээ харуулахын тулд олон байгууллагыг улсын үйлдвэрийн газар болгосон. 220 мянга орчим төрийн албан хаагчтай болсон. Удирдлагын академи улсын үйлдвэрийн статустай болсон. Ийм статустай олон байгууллагыг бий болгож, төрийн албыг нэмэгдүүлсэн. Төрийн өмчит компаниудын асуудалд УИХ нэхэл хатуутай байж, шаардаж ажиллана шүү” гэлээ.

С.Сүлд