Б.Баттөмөр, Х.Булгантуяа, Г.Амартүвшин, Ч.Ундрам нарын гишүүд Зээлийн хүүг бууруулах стратеги батлах УИХ-ын тогтоолын төслийг УИХ-ын дарга Г.Занданшатарт өчигдөр өргөн барьсан. Үүнтэй холбоотойгоор гишүүдийг зүгээс мэдээлэл хийлээ.

Мэдээллийн эхэнд УИХ-ын гишүүн Б.Баттөмөр "Банкны зээлийн хүү жилийн 11, 12 хувьтай байна. Монгол Улсад зээлийн хүүг бууруулах чиглэлээр олон тогтоол шийдвэр өмнө нь гарч байсан. 2011 онд УИХ-ын тогтоол гарч, зээлийн хүүг бууруулах, 2014-2016 онд зээлийн хүүг бууруулах чиглэлээр тогтоол гарсан. Өнгөрсөн дөрвөн жилийн хугацаанд 20.5 хувьтай байсан зээлийн хүү 16.3 болтлоо буурсан. Бидний авч буй арга хэмжээний хүрээнд дөрвөн жилийн хугацаанд жил бүр 1 хувиар буурах ингээд 2023 оны эцэс гэхэд сарын 1 хувийн хүүтэй байхаар тооцоолол гаргасан" гэв.

Харин Г.Амартүвшин гишүүн "Хадгаламжийн хүүгийн тухайд чөлөөт зах зээлийн зарчмаар явна. Тусгай нөхцөлтэй хадгаламж гэж байдаг. Үүнийг  хязгаарлах талаар Монголбанктай хамтран анхаарлаа төвлөрүүлж ажиллана. Системийн том банкууд тусгай нөхцөлтэй хадгаламж авах нь багассан байх. Бусад банк хэвээрээ байгаа гэж бодож байна. Банкуудын үйл ажиллагааны зардлын тухайд тогтоол баталсны дараа Монголбанк өөрийн хамааралд байгаа зардал шимтгэлээ бууруулна. Үүнийг дагаад арилжааны банкууд шимтгэлүүдээ бууруулах шаардлагатай. АТМ, пос машин, гүйлгээний шимтгэлийг буулгах арга хэмжээг дорвитой явуулна" гэсэн юм.

Мөн "Банкны зүгээс макро эдийн засгийн үзүүлэлтүүдээ сайн байлгах шаардлага тавьсан. Банкны салбарыг эрүүлжүүлэхийн тулд эрсдэлийг нь бууруулая, эх үүсвэрээ татах болон үйл ажиллагааны зардлыг тодорхой хэмжээгээр багасгах, энэ системд реформ хийе гэсэн зорилтууд дэвшүүлсэн" гэсэн тайлбарыг УИХ-ын гишүүн Х.Булгантуяа өглөө.

С.Сүлд