Сонгуулийн ялагдлаас хойш Намынх нь дарга С.Эрдэнэ өөрийн хүсэлтээр огцорч, удирдлагын бүрэлдэхүүнээсээ эхлээд шинэчлэл хийх ёстой хэмээх шүүмжлэлд өртөх болсон АН-ын залуу гишүүд гишүүнчлэлээ сэргээж эхэлжээ. Тодруулбал, АН-ын даргын үүрэг гүйцэтгэгч, УИХ-ын гишүүн Ц.Туваан тушаал гаргаж, АН-ын гишүүн П.Галиндэв, Д.Сүндий, Н.Соёмбо нарыг Намын гишүүнчлэлээс хассан сахилгын шийтгэл ногдуулсан шийдвэрийг хүчингүй болгожээ. Ингэснээр тэд намдаа буцан орох боломжтой болсон байна.

Энэ дагуу нийслэлийн АН-ын даргын үүрэг гүйцэтгэгч Д.Пүрэвдаваа, Хэрэг эрхлэх газрын дарга П.Нүрзэд нар Ц.Тувааны гаргасан шийдвэрийн хүрээнд П.Галиндэв, Д.Сүндий нарын гишүүнчлэлийг сэргээж байгаа тухайгаа танилцуулсан юм.

Тушаалыг тус намын Хэрэг эрхлэх газрын дарга П.Нүрзэд танилцуулахдаа, "АН-ын үндсэн дүрмийн 3,9,4-т,  тавдугаар бүлгийн 5,17,1-т зааснаар гаргасан өргөдлүүдийг тус тус үндэслэн тушаах нь: 2020 оны тавдугаар сарын 22-ны өдрөөс намын гишүүнчлэлээс гарсан болон эрхээ хязгаарлуулсан намын дарга Б/68 тоот тушаалаар гишүүнээр 4-8 хүртэлх жилийн хугацаатай хасах сахилгын шийтгэл  ногдуулсныг наймдугаар сарын 13-ны өдрөөс хүчингүй болгосонд тооцсугай" гэсэн юм. 

П.Галиндэвийн хувьд өнгөрсөн сонгуулиар Баянгол дүүрэгт өрсөлдөж байв. Харин Д.Сүндий өөрт нь тойрог олдоогүйн улмаас Чингэлтэй дүүрэгт нэр дэвшиж байсан удаатай.

С.Сүлд