УИХ дахь Ёс зүй, сахилга хариуцлагын байнгын хороо Засгийн газрын 2020-2024 оны үйл ажиллагааны мөрийн хөтөлбөрийн хуулийн төслийн анхны хэлэлцүүлгийг хийлээ. Энэ үеэр байнгын хороон гишүүд үг хэлж, асуулт асуусан юм. 

Х.Баделхан: Төрийн албан хаагчдын тоо сүүлийн жилүүдэд хэдий хэмжээгээр нэмэгдсэн бэ. Бусад улстай харьцуулахад ямар хэмжээтэй байна вэ. Шинэ Засгийн газар 100 хоногт багтаагаад төрийн албаны үйл ажиллагааг цахимд шилжүүлэх зорилт дэвшүүлсэн. Энэ нь сайн хэрэг. Дээрх асуултад хариулт өгнө үү

Төрийн албаны зөвлөлийн дарга Б.Баатарзориг: Төрийн албан хаагчийн тоотой холбоотойгоор судалгаа бий. Монголын 200 гарй мянган төрийн албан хаагчийн 60 хувь нь 1980 оноос хойш төрсөн залуучууд эзэлж байна. Иймээс төрийн албыг цахимжуулахаас өөр аргагүй.

Б.Баярсайхан: Өнгөрсөн 30 жилээ дүгнэхэд хаана очоод гацсан гэхээр ёс зүй. Энэ хүрээнд төрийн албан хаагёийн ёс зүйн хуультай болох гэж байгаад баяртай байна. Төрийн алба цахимжих ч гэсэн тодорхой тооны төрийн албан хаагч мэдээж ажиллана. Төрийн албаны шалгалт өгч байгаа иргэдийн хандлагын суурь гарч ирсэн үү. Анхнаасаа төлөвшсөн иргэдийг төрийн албанд оруулах хэрэгтэй. Энэ талаар ажиллаж байгаа зүйл бий юу.

Төрийн албаны зөвлөлийн дарга Б.Баатарзориг: Төрийн албанд хийх шинэтгэлийн эрэмбэ тогтоож үзсэн. Үүнд ёс зүйтэй холбоотой асуудал өндөр давтамжтай гарч ирсэн. Удаах нь хандлага. Төрийн албаны шалгалтын агуулга, авах аргыг нь өөрчилсөн. Сэтгэл зүйн тест оруулах эхлэлийг тавьсан.

А.Сүх