Он гарсаар золгүй байдлаар буюу санамсар болгоомжгүй байдал, зам тээврийн осол, үйлдвэрлэлийн ослоор амиа алдах хэрэг их гарах болсон. Иймээс 24tsag.mn сайт золгүй ослын 24 баримтыг хүргэж байна.
    Он гарсаар золгүй байдлаар буюу санамсар болгоомжгүй байдал, зам тээврийн осол, үйлдвэрлэлийн ослоор амиа алдах хэрэг их гарах болсон. Иймээс 24tsag.mn сайт золгүй ослын 24 баримтыг хүргэж байна.

1.    Авто ослоор амиа алдсан иргэдийн хамгийн балчир нь нэг ой зургаан сартай бяцхан хүү байв. Хүүгийн аав “Портер” маркийн автомашинаа өгсүүр газар тавихдаа аюулгүй байдлыг нь бүрэн хангаагүйгээс  машин ухрахдаа нэг ой зургаан сартай И-г дайрсан байдаг. Үүний улмаас бяцхан хүү эмнэлгийн тусламж авч чадалгүй газар дээрээ нас барсан юм. Уг хэрэг өнгөрсөн зургадугаар сард Баянзүрх дүүрэгт гарсан.

2.    Үүнтэй адил харамсалтай осол өнгөрсөн амралтын өдрөөр гарав. Булган аймгийн Дашинчилэн сумын Хонхор нуур гэх газар оршин суух иргэн Б-ийн портер машинд гурван настай хүү нь тоглож байгаад түлхүүрээр нь машиныг хөдөлгөсөн байдаг. Улмаар машин хөдлөхөд машины хажууд тоглож байсан хоёр настай эрэгтэй Т-г дайрч, амь насыг нь хөнөөсөн юм.

3.    Мөн өнгөрсөн наймдугаар сард Завхан аймгийн Идэр суманд жолооч 3 машинтайгаа ухарч байгаад нэг нас долоон сартай охиныг дайрч, амь насыг нь хөнөөсөн байдаг.

4.    Түүнчлэн өнгөрсөн дөрөвдүгээр сард Хэнтий аймагт иргэн Э хоёр настай охиноо машиндаа суулган явж байтал машины хаалга гэнэт онгойж, хоёр настай охин нь унаж, хажуугаар зөрөн явж байсан машинд дайрагдан нас барсан байдаг.

5.    Бага насны хүүхэд ослоор амиа алдсан хэрэг үүгээр дуусахгүй. Завхан аймгийн Эрдэнэхайрхан сумын нутаг Хайрхан багт “ММС Delica” маркийн 65-58 УБЧ  дугаартай автомашины жолооч Ц явган зорчиж байсан дөрвөн настай Д-г дайрч амь насыг нь хохироосон билээ.

6.    Мөн Сэлэнгэ аймгийн Мандал сумын Цагаан чулуут гэдэг газар “Toyota Cluger” маркийн машин эрэг рүү унаснаас 27 настай Н, дөрвөн настай А нар харамсалтайгаар амиа алдсан юм.

7.    Энэ мэт санамсаргүй болгоомжгүй байдлаас болж,бяцхан хүүхдүүд амиа алдаж байхад согтуу жолоочийн гайгаар арван настай бяцхан хүү амиа алдав. Өнгөрсөн дөрөвдүгээр сарын 23-нд Ш.Алтанхуяг гэгч нь Баянгол дүүргийн VI хороо, 25 дугаар эмийн сангийн урд замд согтуугаар тээврийн хэрэгсэл жолоодож яваад гарцаар зам хөндлөн гарч явсан 10 настай хүүхдийг дайрч, амь насыг нь хөнөөсөн юм. Тэрээр осол гаргахдаа 70 хувийн согтолттой, өөрийгөө хянах чадвараа алдсан байсан нь мөрдөн байцаалтаар тогтоогдсон байдаг.

8.    Мөн үүний дараа өнгөрсөн зургадугаар сард Сонгинохайрхан дүүргийн толгойтын 91 дүгээр гудамжинд “Hyundai Exсel” маркийн автомашины жолооч X согтуугаар жолоо барьж, найман настай Б-г дайрч, амь насыг нь хохироосон. Тэрээр жолоо барих үедээ 1.29 хувийн согтолттой байсан нь тогтоогдсон юм.

9.    Түүнчлэн согтуу жолоочийн гай нэг биш олон хүний аминд хүрсэн ноцтой осол өнгөрсөн амралтын өдрөөр гарав. Өмнөговь аймгийн Баяндалай суманд оршин суух О-гийн гэрийг 35 настай эрэгтэй А согтууруулах ундаа хэтрүүлэн хэрэглэсэн үедээ жолоо барьж байгаад дайрсаны улмаас гэрт байсан гурван эмэгтэй, арван настай хүү нар харамсалтайгаар амиа алдсан билээ.

10.    Харин хичээлийн шинэ жил эхлээд нэгхэн хонож байхад долоон настай охин харамсалтайгаар амиа алдав. Баянгол дүүргийн зургадугаар бичил хороолол, 13 сургуулийн хоёрдугаар ангийн сурагч зам хөндлөн гарч яваад машинд дайруулан амиа алдсан юм. Охины амиа алдсан сургуулийн дэргэдэх замд хурд сааруулагч, явган хүний гарц, сургууль, цэцэрлэгийн орчим байрлуулдаг “Анхаар хүүхэд” гэсэн тэмдэг аль нь ч байдаггүйгээс ийнхүү амиа алдсан билээ.

11.    Ослын улмаас амиа алдсан иргэдийн тоо үүгээр дуусахгүй. Өнгөрсөн зургадугаар сард гэхэд Булган аймгийн Рашаант сумын нэгдүгээр багийн “Бичигт хад” гэх газарт ноцтой осол гарч, нэг хүн нас барж, долоон хүн гэмтсэн юм. “Баянхонгор-Улаанбаатар” чиглэлийн хот хоорондын зорчигч тээврийн УНӨ-8849 улсын дугаартай “Истана” маркийн 24 зорчигчтой бага оврын автобус, УНО-8761 улсын дугаартай “Хюндай” маркийн хүнд даацын ачааны автомашинтай мөргөлдсөн. Уг ослын улмаас бага оврын автобус дотор зорчиж явсан 51 настай эмэгтэй газар дээрээ нас барсан билээ.

12.    Мөн Увс аймгийн Сагил суманд шатахуун тээвэрлэж явсан ОХУ-ын хоёр камаз хоорондоо мөргөлдөж, ослын улмаас нэг жолооч газар дээрээ нас барж, нэг жолооч нь хүнд бэртсэн юм.

13.    Түүнчлэн Өмнөговь аймгийн Цогт-Цэций сумын нутаг дэвсгэрт уул уурхайн компанийн гурван ажилтныг  ажлаасаа буугаад явж байхад нь том оврын автомашин дайрч, нэг нь газар дээрээ нас барж, хоёр нь хүнд гэмтсэн байдаг.

14.    Мөн дөрвөн хүний амийг авч одсон осол өнгөрсөн зургадугаар сард гарав. Хэнтий аймгийн Жаргалтхаан сумын нутаг “Хамар даваа”-нд явж байсан “Toyota Land Cruiser” маркийн машин онхолдсонооос дотор нь сууж явсан 55 настай эрэгтэй, 23,33 настай хоёр эмэгтэй, гурван сартай хүүхэд харамсалтайгаар амь насаа алдсан билээ.

15.    Тус сард мөн эхнэр нөхөр хоёр зам тээврийн ослоор амиа алдав. Булган аймгийн Хангал сумын нутагт “Accent” маркийн машин нь онхолдож, 49 настай эрэгтэй, 47 настай эмэгтэй нар нас барсан байдаг.

16.    Наадмын өмнөхөн олон хүний амийг авч мэдэхээр томоохон осол гарсан нь 40 тонны чингэлэг жижиг машин дээр унасан осол байв. “ТЭЦ-3”-ын ойролцоо явж байсан хүнд даацын авто машины ачаа хажуугаар явж байсан Prius-20 маркийн машин дээр унаж, жолооч нь нас барж, хоёр эмэгтэй хүнд бэртсэн билээ. Тухайн үед 40 тоннын чингэлэг дотор дүүрэн газ ачиж явсан юм. Азаар 40 тонны чингэлэг дотор байсан газ дэлбэрээгүй. Хэрвээ тэр олон газ ямар нэг байдлаар дэлбэрсэн бол онц аюултай осол болох байсан нь тодорхой.

17.    Хамгийн сүүлийн жишээг дурьдахад, өчигдөр Баянзүрх дүүргийн нутаг, “Ургах наран” хорооллын баруун талын автозамд Төв аймгийн дугаартай “Тоёота Харриер” макийн дунд оврын жийп машин хурд хэтрүүлэн гүйцэж түрүүлэх үйлдэл хийх гэж байгаад замын хажуу руу онхолдсон. Улмаар нэг хүн газар дээрээ нас барж, нэг хүн хүнд гэмтсэн юм.
18.    Зам тээврийн ослоос гадна золгүй байдлаар амиа алдсан харамсалтай хэргүүд ч гарч байна. Өнгөрсөн тавдугаар сард гэхэд Дорнод аймагт гарсан галыг унтраахаар ажиллаж байсан Онцгой байдлын таван алба хаагчийн дөрөв нь амиа алдав. Галыг унтрааж байхдаа гурван алба хаагч нь амиа алдсан бол түлэгдсэн хоёр алба хаагчийн нэг нь эмнэлэгт очсон хойноо амиа алдсан билээ.

19.    Мөн эцэг эхийн санамсаргүй болгоомжгүй байдлаас болж, гурван ч бяцхан хүүхэд ухсан жорлонгийн нүхэнд унаж амиа алдав. Тодруулбал, Өвөрхангай аймгийн Арвайхээр суманд нэг нас нэг сартай хүү жорлонгийн нүхэнд унасан бол Налайх дүүргийн гуравдугаар хороонд хоёр настай хүү, Сүхбаатар дүүргийн XVIII хороо Бэлхэд нэг нас найман сартай охин Ч жорлонгийн нүхэнд унаж амиа алдсан юм.

20.    Түүнчлэн өнгөрсөн наймдугаар сарын эхээр Баянгол дүүргийн долдугаар хороонд дөрвөн настай A охин халуун цайнд түлэгдэж амиа алдсан байдаг.

21.    Харин Үндэсний их баяр наадмын үеэр 13 настай хоёр ч хүү морьноос унаж амиа алдсан. Баянхонгор аймгийн Гурванбулаг сумын төвд Соёолон насны морь унаж байсан 13 настай эрэгтэй Т мориноос унасан. Мөн Хөвсгөл аймгийн Түнэл сумын Харган гэх газар 13 настай хүүхэд мориноос унаж амиа алдсан юм.
22.    Мөн өнгөрсөн хавар "Нүхт" амралтын газрын тоглоомын саадны хажууд баригдаж байсан барилга нурснаас таван хүн дарагдаж, нэг хүн амиа алдсан билээ. 

23.    Хамгийн эмгэнэлтэй харамсалтай хэрэг есдүгээр сарын 3-нд гарав. Баянгол дүүргийн нэгдүгээр хороо, Шастины нэрэмжит III эмнэлгийн баруун талд баригдаж буй барилгад бетон зуурмаг шахаж байсан кран осолдсоны улмаас ойролцоох замын гарцаар гарч явсан 12 настай хүүхдийн дээрээс нурж, амь насыг нь хохироосон юм.12 настай охин хичээлээ тараад ээж, эгч хоёртойгоо зам хөндлөн гарч яваад ийнхүү амиа алдсан билээ. Урьдчилсан байдлаар зуурмаг шахагч машины тулгуур газарт цөмөрсний улмаас осол гарсан гэдэг.

24.    Уг хэргийн дуулиан намжаагүй байтал өнгөрсөн долоо хоногт дахин нэг хүн барилгын ослоор амиа алдав. Хан-Уул дүүргийн 14 дүгээр хороонд “Хурд” компанийн барьж буй “Рапид харш” орон сууцны хороололд өргөгч караны толгой салж унаснаас 26 настай С амиа алдсан билээ.