Коронавирусний цар тахалтай холбоотой асуудлаар Шадар сайд Я.Содбаатар мэдээлэл хийлээ. Энэ үеэр гишүүд үг хэлж, асуулт асуулаа.

Б.Энх-Амгалан: Коронавирусний цар тахал дэлхий дахинд дэгдсэнээс хойш Засгийн газар шуурхай арга хэжмээ авч ажилласан. Амаргүй нөхцөл байдалд хорио цээр тогтоож иргэдээ татан авсан. Гаднаас ирж байгаа иргэдийн хувьд тусгаарлах журам зэргийг зөрчиж зарим асуудлыг гаргаж байсан. Монгол Улс хөнжлийнхөө хэрээр хөлөө жийж байна. Голомт руу өөрсдөө очиж эрсдэлтэй нөхцөл байдалд иргэдээ татаж авсан. Уханиас иргэдээ татан авсан хэдхэн улсын тоонд манай улс багтдаг. Тусгаарлах байрны хэмжээ багатай, эмчилж байгаа эмч нарын тоо хязгаартай. Тэд 24 цагаар ажиллаж байна. Ийм нөхцөл байдалд ажиллаж дотооддоо халдвар тараагаагүй ганц улс нь Монгол Улс.

Хил, гааль, цагдаа хүчин, Элчин сайдын яам, Консулын газарт ачаалалттай ажиллаж байгаа иргэдийг монгол төр урамшуулах ёстой.

Энэ дээр УОК ямар санал, санаачилга гаргаж байгаа вэ. Хоёрдугаарт, цар тахалтай энэ үед улс орон бүр амь амиа бодоорой гэж явж байна. Дэлхийн хаана ч очоод амьдарчихна гэдэг хүмүүст харах төртэй, эх оронтой хүн ямар сайхан байдаг юм гэдгийг мэдрүүллээ. Одоо дотоодын эдийн засгийг сэргээх, өөрөө өөрийгөө тэтгэх асуудалд Засгийн газар хэрхэн анхаарч байна вэ?

Я.Содбаатар: УОК-оос өндөржүүлсэн бэлэн байдалд ажиллаж байгаа алба хаагчдыг анхаарах, урамшуулах ажлыг явуулж байгаа. Нийт 1000 гаруй байрыг алба хаагчдад хөнгөлөлттэй олгож байна. Одоогоор 850 орчим орон сууны асуудал шийдэгдсэн. Мөн ар гэрт нь мөнгөн тусламж үзүүлэх талаар төсвийн тодотголд суусан. Ер нь алба хаагчид амаргүй нөхцөлд ажиллаж байгаа юм байна лээ. Сэтгэл зүйн хувьд ч, нөхцөл байдлын хувьд ч тэр ялгаагүй. Хоёрдугаарт, хандив хөрөнгөний тодорхой хувийг алба хаагчиддаа олгож байгаа.

Б.Лхам