Засгийн газрын ээлжит бус хуралдаанаар Тагнуулын ерөнхий газрын дарга Д.Гэрэлийг үүрэгт ажлаас нь чөлөөлөх шийдвэр гаргасан. Үүнтэй холбоотой асуудлаар УИХ-ын гишүүн Т.Аюурсайханаас тодрууллаа.

-Өнгөрсөн мягмар гарагийн Засгийн газрын хуралдаанаар ТЕГ-ын даргыг үүрэгт ажлаас нь чөлөөлсөн. Ямар үндэслэлээр чөлөөлсөн юм бэ?

-ТЕГ-ын дарга өөрөө албан тушаалаасаа чөлөөлөгдөх өргөдөл өгсөн юм байна гэдэг л мэдээлэл авсан.

-Та тусгай хяналтын дэд хороон гишүүн. Дэд хороонд ЗГХЭГ-ын дарга Л.Оюун-Эрдэнэ намайг тагнаж чагнасан. Над дээр хууль бус гүйцэтгэх үйл ажиллагаа явуулсан гэсэн өргөдөл өгсөн. Ямар асуудал яригдсан юм бэ?

-Энэ талаарх өргөдөл, гомдолтой одоогоор танилцаагүй байна. Тусгай хяналтын дэд хороо уг асуудалтай холбогдуулан хуралдаагүй.

-Л.Оюун-Эрдэнэ сайд өөрөө өргөдөл өгсөн гэж мэдэгдсэн. Өргөдөл нь хаана байгаа юм бэ?

-Тусгай хяналтын дэд хороонд өгсөн бол дэд хороонд л байгаа байх. Би дэд хороон гишүүн. Дэд хороон дарга л өргөдөл гомдолтой танилцана. Хэрэв дэд хороог хуралдуулна гэвэл хуралдана. Тагнаж, чагнасан асуудал бий бол нэлээд ноцтой асуудал. Хууль тогтоомжид нийцээгүй бол гэмт хэргийн нөхцөл байдал үүснэ.

-Өргөдөл гомдол хүлээн авсан тохиолдолд хэд хоногийн дотор хэлэлцэж, шийдвэрлэх заалттай юм бэ?

-30 хоногийн зохицуулалттай. Энэ асуудалд шуурхай арга хэмжээ авах байх гэж бодож байна.

-Дээрх асуудалтай холбогдуулж ТЕГ-ын даргыг чөлөөлсөн гэсэн яриа байна?

-Мэдэхгүй байна.

-ТЕГ-ын дараагийн даргаар УИХ-ын гишүүн асан Ж.Энхбаярын нэр яригдаж байна. Энэ талаар мэдээлэл бий юу?

-Засгийн газрын бүрэн эрхийн асуудал. Энэ талаар мэдээлэл байхгүй байна.

Б.Лхам