Сонгуулийн ерөнхий хорооны удирдлагыг чөлөөлж байгаа асуудлаар УИХ-ын гишүүн Д.Тогтохсүрэнгээс тодрууллаа.

-МАН-ын бүлгийн хурлаар СЕХ-ны нэр дэвшсэн гишүүдийн асуудлаар хэлэлцсэн гэсэн. Энэ талаар мэдээлэл өгөхгүй юу?

-УИХ-аас ЦЕГ-ын дарга Ж.Болд, УИХ-ын Тамгын газрын Хууль эрх зүйн хэлтсийн дарга Э.Түвшинжаргал мөн Т.Дэлгэрнаран, ҮАБЗ-ийн ажлын албаны дарга Д.Даваа-Очир нарыг СЕХ-ны гишүүнээр томилох эсэх асуудлыг бүлгийн хуралдаанаар хэлэлцсэн.

-Ээлжит бус чуулганаар томилогдоно гэсэн үг үү?

-Тийм. Чуулганыг өнөөдөр багтааж дуусгана.

-УИХ-ын сонгуулийн өмнө Ерөнхийлөгч Х.Баттулга СЕХ-н удирдлагуудыг яаралтай чөлөөл гэж мэдэгдэж байсан. Энэ дагуу хийгдсэн ажил уу?

-СЕХ-ны дарга болон нарийн бичгийг ямар нэгэн шахалтаар чөлөөлөөгүй. Өөрсдөө хүсэлт гаргасан. УИХ-ын сонгууль тулчихсан үед яригдаж байсан. Гэхдээ нэгэнт сонгууль тулчихсан учраас СЕХ-ны удирдлагуудыг өөрчилж болохгүй гэсэн байр суурь дээр байсан. Энэ хүрээнд одоо шийдвэрлэж байна.

-СЕХ-ны даргыг МАН-аас, нарийн бичгийг АН-аас сонгох тохироотой гэсэн мэдээлэл явж байсан. Энэ үнэн үү?

-Тохироо хийсэн асуудал байхгүй. Эдгээр нь төрийн жинхэнэ алба хаагчид байгаа. Гишүүдийн асуудлыг үдээс хойшхи ээлжит бус чуулганы хуралдаанаар шийдэх болов уу гэж болож байна.

-Тагнуулын ерөнхий газрын даргаар УИХ-ын гишүүн асан Ж.Энхбаярыг томилно гэсэн асуудал яригдаж байна. Бүлэг дээр яригдсан зүйл бий юу?

-Хэвлэлийн мэдээ сонссоноос биш энэ талаар мэдээлэлгүй байна.

-Засаг захиргаа, нутаг дэвсгэрийн нэгжийн тухай хууль түүний удирдлагын тухай хуулийн шинэчилсэн найруулга ямар үзэл баримтлалын хүрээнд боловсруулагдаж байна вэ?

-Өмнөх парламентын үед өргөн барьсан. Шинэ парламент бүрдээд аажлын хэсэг гаран ажиллаж байна. Байнгын хороогоор анхны хэлэлцүүлгийг хийсэн. Одоо нэгдсэн чуулганаар хэлэлцэх үйл ажиллагаа явж байгаа. Гэвч АН-ын бүлгийн зүгээс орон нутгийн сонгууль дуустал хуулийг хойшлуул өгөх хүсэлт тавьсан. Энэ талаар чуулганаар шийдэх байх. Бидний зүгээс АН-ын шийдвэрт хүндэтгэлтэй хандаж байгаа.

Б.Лхам