Ерөнхийлөгч Х.Баттулга өнөөдөр Хан-Уул дүүргийн ээжүүдэд “Эхийн алдар” одон гардууллаа.

Ерөнхийлөгчийн зарлигт “Үндсэн хуулийн 33.1.7, Ерөнхийлөгчийн тухай хуулийн 15 дугаар зүйлийн 1 дэх хэсэгт ззасныг үндэслэн Хан-Уул дүүргийн харьяа олон хүүхэд төрүүлж, хүмүүжүүлсэн дараахь ээжүүдийг шагнасугай” гэжээ.

“Эхийн алдар” нэгдүгээр одонгоор тус дүүргийн IX хорооны иргэн Д.Нарантуяа, Ц.Баярцэцэг, I хорооны иргэн Б.Алтантүлхүүртгардууллаа.

“Эхийн алдар” хоёрдугаар одонгоор XV дугаар хорооны иргэн Ц.Мөнхсаран, XIX дүгээр хорооны иргэн Б.Мандухай, Г.Байгальмаа, XX хорооны иргэн Б.Болортуяа, XVII хорооны иргэн З.Уранцэцэг, XII хорооны иргэн Ж.Учрал, XI хорооны иргэн Д.Хулан, XIX хорооны иргэн Б.Уянга, III хорооны иргэн Ч.Дуламсүрэн, XVIII хорооны иргэн Н.Ундармаа, XIII хорооны иргэн П.Туул, XVIII хорооны иргэн Д.Шинэбаяр, II хорооны иргэн Б.Цэрэндулам, VII хорооны иргэн Б.Нарангэрэл, IV хорооны иргэн Ч.Сүрэнхорлоо, XI хорооны иргэн Б.Бүжинлхам, XIX дүгээр хорооны иргэн Б.Цолмон, XVII хорооны иргэн Д.Мөнхтуяа, XVIII хорооны иргэн Ш.Эрдэнэтуяа, XI хорооны иргэн М.Энхбаяр, Ч.Болор, Х.Нэргүй, VII хорооны иргэн Л.Онон, XIX хорооны Б.Энхжаргал нарт тус тус гардууллаа.

Ерөнхийлөгч Х.Баттулга “Ачит ээж нараа. Монгол хүн бүрийн хүндэтгэл, хайр нь болсон эхчүүд ээ. Энэ жил дэлхий дахинд тархсан коронавируст цар тахлын улмаас “Хүүхдийн баяр”-аар гардуулдаг уламжлалыг хойшлуулж, хэд хоногийн өмнөөс орон нутаг, дүүргүүдэд зохион байгуулж гардуулж байна. Өнөөдөр Хан-Уул дүүргийн 613, Налайх дүүргийн 125, Багануур дүүргийн 90 ээж Багахангай дүүргийн 10 ээжид “Эхийн алдар” I, II зэргийн одонг гардуулж байна.

Бурхны шашинд эх болсон зургаан зүйл гэж хэллэг байдаг. Энэ нь бусдыг ачит эхтэйгээ зүйрлэн санах, ээжийгээ хайрладаг, энэрдэг шигээ бусдад хандахыг сургаж байгаа юм.

Ээж бол хүн бүрийн хамгийн ойр, хамаг хайр халамжаа зориулах хүслэн болсон хүн байдаг. Яагаад гэвэл эх хүний үрдээ гаргасан хэмжээлшгүй их хайр, хүүхдийнхээ төлөө ямар ч бэнэрхийг давах чин сэтгэл зүтгэлийг хүн бүр амсаж мэдэрч өсдөг. Тийм болохоор эхийн ачийг яаж хариулах вэ, ээжийгээ хэрхэн баярлуулах вэ гэдгийг монгол хүн бүр хичээн санаж явдаг.

“Эхийн алдар” одон та бүхний нэгэн шөнө үрээ хуурайлсан бүүвэйлсэн ачийг хариулж чадахгүй ч үр хүүхдүүдийг чинь хүндэтгэх хайрын өчүүхэн атугай илэрхийлэл болж чадах байх. Монголын төр үр хүүхдүүдийн чин хайр, хүсэл сэтгэлийг нэгтгэн төлөөлүүлж энгэрт тань “Эхийн алдар” одонгоо зүүж өглөө. Монголчууд бидний эрхэм зүйл болсон хүүхдүүдээ эрүүл, аюулгүй орчинд өсгөн бойжуулан, сурган хүмүүжүүлэх нөхцөлийг бүрдүүлэхэд төр онцгой анхаарч тодорхой бодлого шийпдэл гаргаж хэрэгжүүлэх замаар эхчүүдийгээ дэмжих, ирээдүй хойчоо хамгаалах ёстойг бид мартаж болохгүй.

Хүүхэд хамгаалал, эхчүүдийн нийгмийн асуудал зэргийг төр үргэлж анхааралдаа байлгаж, бодлого боловсруулах, хэрэгжүүлэх чиглэлээр миний бие тодорхой ажил санаачилсан. Цаашид ч УИХ, Засгийн газрыг шахаж шаардаж ажиллана.

Өнөөдөр одонгоо гардан авч байгаа ээж нартаа, өнөр монголыг бүтээлцэж буй эхчүүд та бүхэндээ үр хүүхдүүдийн тань нэрийн өмнөөс болон хувиасаа сайн сайханыг хүсье.

Мөнх тэнгэрийн дор үр хүүхэд эрүүл энх, амар амгалан аж төрөх болтугай” гэлээ.            Б.Лхам